چاغی میں سیکیورٹی فورسز کی گاڑی میں آگ لگنے سے 2 اہلکار شہید
تیل کا کین پھٹنے کے باعث گاڑی میں آگ لگی، تین اہلکار محفوظ رہے جبکہ ایک زخمی
October 04, 2023
بلوچستان کے علاقے چاغی کے قریب سیکیورٹی فورسز کی گاڑی میں آتشزدگی کا واقعہ پیش آیا، جس میں دو اہلکار شہید ہوگئے۔
لیویز حکام کے مطابق چاغی کے علاقے گردی جنگل کے قریب سیکیورٹی فورسز کی گاڑی میں پیچھے رکھے گئے تیل کا کین پھٹنے کے بعد آگ لگ گئی، گاڑی میں 6 اہلکار سوار تھے۔
آگ اس قدر تیزی سے پھیلی کہ پیچھے بیٹھے اہلکاروں کو سنبھلنے کا موقع نہیں ملا اور گاڑی دیکھتے ہی دیکھتے مکمل خاکستر ہوگئی۔
لیویز کے مطابق حادثے کے نتیجے میں دو اہلکار شہید جبکہ ایک زخمی ہوا اور تین بالکل محفوظ رہے۔