اسرائیل کی غزہ تل ابیب پر جوابی بمباری میں 232 فلسطینی شہید 1700 زخمی
بمباری کا سلسلہ وقفے وقفے سے تاحال جاری، وزارت صحت نے شہادتوں کی تصدیق کردی، غزہ کو بجلی کی ترسیل منقطع
حماس کے اسرائیل پر بڑے حملے کے بعد اسرائیل کی غزہ پر جوابی بمباری کے نتیجے میں 232 کے قریب فلسطینی شہید اور 1600 سے زائد زخمی ہوگئے۔
عرب میڈیا کے مطابق حماس کے اسرائیل پر حملے بعد اسرائیل نے غزہ پر بمباری شروع کردی، بمباری کا سلسلہ وقفے وقفے سے تاحال جاری ہے، ہر تھوڑی دیر بعد غزہ کے کسی حصے پر اسرائیلی ہوائی جہاز میزائل حملے کررہے ہیں اور ہر کچھ دیر بعد غزہ کے کسی کسی حصے سے دھواں اٹھتا ہوا دکھائی دے رہا ہے۔
اسرائیلی فوج کا کہنا ہے کہ اس نے راکٹ حملوں کے جواب میں غزہ میں حماس کے اہداف پر جوابی فضائی حملے کیے ہیں۔
عرب میڈیا کے مطابق اسرائیلی فوج حماس کے جنجگوؤں کے نام پر غزہ میں جگہ جگہ معصوم جانوں کو نشانہ بنارہی ہے، اب تک اسپتالوں میں دو سو سے زائد فلسطینی باشندوں کی لاشیں لائی جاچکی ہیں جبکہ ایک ہزار سے زائد افراد زخمی ہوچکے ہیں، غزہ میں اس وقت شدید ترین جنگی کیفیت طاری ہے تاہم اس کے باوجود فلسطینی باشندوں کے حوصلے بلند ہیں اور وہ اسرائیل پر ہوئے اس بڑے حملے پر خوش ہیں۔
غزہ کی وزارت صحت نے کم ازکم 232 شہادتوں اور 1700 سے زائد افراد کے زخمی ہونے کی تصدیق کی ہے۔ الجزیرہ کے نمائندے نے بتایا کہ اسرائیلی حملے میں غزہ کے جنوب مغرب میں تل الحوا محلے میں ایک مکان کو نشانہ بنایا گیا۔
یہ پڑھیں : آپریشن طوفان الاقصی؛ حماس کے ہزاروں راکٹ حملوں میں 200 اسرائیلی ہلاک اور ہزار زخمی
اسرائیلی طیاروں نے غزہ میں رہائشی عمارت پر حملہ کیا جس کے نتیجے میں وہ زمیں بوس ہوگئی، جبکہ ویسٹ بینک میں بھی اسرائیلی طیاروں نے راکٹ برسائے ہیں۔ اسرائیلی ذرائع نے تل ابیب کے بڑے علاقے کو نشانہ بنانے والے میزائل حملے کے نتیجے میں 8 کے زخمی ہونے کی اطلاع دی ہے، جن میں 3 کی حالت سنگین ہے۔
اُدھر اسرائیل نے غزہ کو بجلی کی فراہمی معطل کردی ہے جس کے بعد پورا شہر اندھیرے میں ڈوب گیا جبکہ تل ابیب میں راکٹ حملوں سے سائرن بجنے لگے۔
الجزیرہ کے مطابق غزہ میں وقفے وقفے سے بمباری کا سلسلہ برقرار ہے، کچھ دیر قبل ہوائی جہاز کے حملے میں ایک کئی منزلہ عمارت تباہ ہوگئی جس میں کئی تعلیمی انسٹی ٹیوٹ بھی قائم کیے تھے، بلڈ بینکوں کے باہر سویلین شہروں کی جانب سے آمد کا سلسلہ جاری ہے کیوں کہ اسپتالوں کی جانب سے بڑے پیمانے پر خون کے عطیات کی اپیل کی گئی ہے۔
اسرائیلی میڈیا کے مطابق اسرائیل کی سیکیورٹی کابینہ کا ہنگامی اجلاس طلب کرلیا گیا اور آئی ڈی ایف نے حماس کے ٹھکانوں کو نشانہ بنانا شروع کر دیا ہے۔
اسرائیلی وزیر اعظم بنیامن نیتن یاہو نے ایک ویڈیو بیان جاری کرتے ہوئے کہا ہے کہ 'ہم حالتِ جنگ میں ہیں' اسرائیل کے وزیر دفاع یواو گیلنٹ نے دھمکی دی ہے کہ حماس نے 'ایک سنگین غلطی' کی ہے اور یہ کہ 'اسرائیل کی ریاست یہ جنگ جیت جائے گی'۔
یہ بھی پڑھیں : اسرائیل پر حملے؛ اسماعیل ہنیہ کی سجدہ شکر بجالانے کی ویڈیو وائرل
واضح رہے کہ رواں سال اسرائیل کے مظالم کے نتیجے میں جنوری سے اب تک تاحال 250 سے زائد مظلوم فلسطینی باشندے شہید ہوئے جبکہ آج کی شہادتیں علیحدہ ہیں۔