امریکا ڈانس پارٹی میں فائرنگ سے 3 افراد ہلاک اور 3 زخمی

امریکا میں فائرنگ سے 3 افراد ہلاک اور 3 زخمی ہوگئے، فوٹو: فائل

---

امریکی ریاست کولوراڈو کے شہر ڈینور میں ایک پارٹی میں ہونے والی فائرنگ سے 3 افرادہلاک اور 3 زخمی ہو گئے۔

امریکی میڈیا کے مطابق پارٹی میں ہونے والی فائرنگ سے ایک شخص موقع پر ہی ہلاک ہوگیا جب کہ 5 افراد کو شدید زخمی حالت میں اسپتال منتقل کیا گیا جہاں مزید 2 افراد کے مردہ ہونے کی تصدیق کردی گئی۔

پولیس نے بتایا کہ ابتدائی تفتیش میں اس خونی واقعے میں دو ہتھیار کے استعمال ہونے کی تصدیق ہوئی ہے تاحال ملزمان کی شناخت نہیں ہوسکی۔ ہلاک ہونے والے تینوں مرد ہیں جب کہ زخمیوں میں 2 خواتین بھی شامل ہیں۔

پولیس کا مزید کہنا تھا کہ ہلاک اور زخمی ہونے والوں کی شناخت ان کے اہل خانہ کی منظوری کے بعد ہی ظاہر کیے جا سکیں گے۔

واضح رہے کہ امریکا میں بندوق سے ہونے والی ہلاکتوں کی تعداد میں اضافہ ہوا جس پر اسلحہ کی خرید و فروخت کے قوانین کو سخت کرنے پر بھی غور کیا جا رہا ہے۔