کوسٹ گارڈ کی گوادر میں کارروائی اسپیڈبوٹ سے اربوں روپے کی منشیات برآمد

ملزمان اپنی اسپیڈو بوٹ ساحل پر چھوڑ کر فرار ہو گئے

---

پاکستان کوسٹ گارڈز نے سمندر میں ایک کارروائی کے دوران اسپیڈ بوٹ سے اربوں روپے مالیت کی منشیات برآمد کرلی۔

ترجمان کے مطابق پاکستان کوسٹ گارڈز نے گوادر کے علاقے جیونی سے سمندر کے ذریعے منشیات اسمگل ہونے کی خفیہ اطلاع پر کارروائی کرتے ہوئے اسپیڈ بوٹ سے منشیات کی کھیپ برآمد کرلی۔

ملزمان پاکستان کوسٹ گارڈز (پی سی جی) کی بوٹ کو دیکھ کر اپنی اسپیڈ بوٹ سمندر کے کنارے چھوڑ کر فرار ہوگئے جس کی چیکنگ کے دوران 833 کلوگرام اعلیٰ کو ا لٹی کی چرس اور 42 کلوگرام آئس برآمد کرلی گئی۔

پکڑی جانے والی منشیات کی عالمی مارکیٹ میں مالیت 20.86 ملین ڈالر (تقریباً 5 ارب روپے سے زائد) بتائی جاتی ہے۔

ترجمان کے مطابق پاکستان کوسٹ گارڈز ہر قسم کی اسمگلنگ بشمول منشیات کی روک تھام کے لیے ہمہ وقت مصروف عمل ہے اور ملکی معیشت کو مستحکم کرنے میں اپنا کردارادا کر تی رہے گی۔