آئس لینڈ کی وزیراعظم خواتین کی تنخواہوں میں اضافے کیلیے احتجاج میں شامل

خواتین تنخواہیں مردوں کے برابر کرنے اور خواتین کیخلاف پرتشدد واقعات روکنے کا مطالبہ کررہی ہیں

ویب ڈیسک October 25, 2023

خواتین کی ترقی کے لیے ہر ممکن اقدامات کیے جائیں گے، وزیراعظم آئس لینڈ:فوٹو:فائل

آئس لینڈ میں خواتین کے تنخواہوں میں اضافے کے لیے احتجاج میں وزیراعظم کیترن یاکبڈاٹرز بھی شریک ہو گئیں۔

غیرملکی میڈیا کے مطابق وزیراعظم کیترن یاکبڈاٹرز نے خواتین کی جانب سے تنخواہوں میں اضافے کے لیے جاری احتجاج میں شرکت کی۔ آئس لینڈ میں ملازمت پیشہ خواتین مردوں کے برابر تنخواہ دینے اور خواتین کے خلاف ہونے والے جرائم پر قابو پانے کا مطالبہ کررہی ہیں۔

وزیراعظم کیترن نے بیان میں کہا کہ میں آج کام نہیں کروں گی اور مجھے توقع ہے کہ کابینہ میں شامل خواتین بھی آج کام نہیں کریں گی کیونکہ ہم خواتین کو مساوی تنخواہیں دینے کے لیے کیے جانے والے احتجاج کا حصہ ہیں۔ میری حکومت اس بات کا جائزہ لے گی کہ کس طرح ان شعبوں کو آگے لایا اور اہمیت دی جائے جو روایتی طور پر خواتین کے لیے مخصوص سمجھے جاتے ہیں۔

وزیراعظم کا مزید کہنا تھا کہ خواتین کے خلاف مظالم روکنا حکومت کا ایجنڈا تھا اور اس ایجنڈے پر عمل در آمد کے لیے ہرممکن اقدامات کیے جائیں گے۔ خواتین کے احتجاج میں اساتذہ، طب کے شعبے اور دیگر شعبوں سے تعلق رکھنے والی خواتین نے شرکت کرتے ہوئے اپنے کاموں سے چھٹی کی۔