آسٹریلوی کرکٹرز نے نیدرلینڈز کیخلاف میچ میں سیاہ پٹیاں کیوں باندھیں
کرکٹ آسٹریلیا نے سوشل میڈیا پر بیان جاری کردیا
آئی سی سی ورلڈ کپ میں نیدرلینڈز کے خلاف میچ میں آسٹریلیا کے کھلاڑیوں نے بازوؤں پر سیاہ پٹیاں باندھ کر حصہ لیا۔
دہلی کے ارون جیٹلی اسٹیڈیم میں کھیلے گئے میچ میں آسٹریلیا نے نیدرلینڈز کو 309 رنز سے شکست دیکر ورلڈ کپ کی تاریخ میں اتک سب سے بڑے مارجن سے جیتنے کا ریکارڈ بنایا تاہم میچ کا ایک اور پہلو آسٹریلیا کے کھلاڑیوں کا بازوؤں پر سیاہ پٹیاں باندھنا تھا۔
مزید پڑھیں: نیدرلینڈز کے بولر نے ورلڈ کپ میں بدترین بولنگ کا ریکارڈ اپنے نام کرلیا
اس حوالے سے آسٹریلوی کرکٹ نے بیان میں کہا ہے کہ گزشتہ دنوں سابق آسٹریلوی اسپنر فواد احمد کے بیٹے کے انتقال پر ان سے اظہار ہمدردی کیلئے آسٹریلوی اسکواڈ نے بازو پر سیاہ پٹیاں باندھ رکھی ہیں۔
بیان میں مزید کہا گیا کہ آسٹریلوی کرکٹ کمیونٹی کی ہمدردیاں اس مشکل وقت میں فواد احمد اور ان کے اہل خانہ کے ساتھ ہیں۔
آسٹریلوی کرکٹر فواد احمد اور ان کی اہلیہ نے رواں سال جون میں اپنے دوسرے بچے کا استقبال کیا تھا جسے صحت کے کئی مسائل کا سامنا تھا، میلبورن کے اسپتال میں اسکا علاج جاری تھا تاہم 23 اکتوبر کو کرکٹر نے اپنے بیٹے کی موت کی خبر کا اعلان کردیا۔
اس وقت فواد احمد وکٹوریہ میں کلب کرکٹ کھیل رہے ہیں حال ہی میں انہوں نے بگ بیش لیگ میں میلبورن رینیگیڈز کے لیے کھیلا تھا۔ وہ 2013 میں آسٹریلیا کے لیے پانچ ون ڈے اور دو ٹی ٹوئنٹی انٹرنیشنل میچز کھیل چکے ہیں۔