پی ٹی آئی رہنما کامران بنگش کی ضمانت منظور دوسرے مقدمے میں گرفتار
کامران بنگش کو ڈی آئی خان پولیس کے حوالے کردیا گیا، ان پر ڈی آئی خان میں عوام کو اشتعال دلانے کا الزام ہے، پولیس
تحریک انصاف کے رہنما اور سابق وزیر کے پی کامران بنگش کی ضمانت منظور ہوگئی تاہم انہیں دوسرے مقدمے میں گرفتار کرلیا گیا۔
ایکسپریس نیوز کے مطابق پولیس پر فائرنگ اور پی ٹی آئی رہنما مراد سعید کو پناہ دینے کے الزام میں درج مقدمات پر گرفتار پی ٹی آئی رہنما کامران بنگش کی ضمانت پر رہائی سے متعلق عدالت میں سماعت ہوئی۔
انسداد دہشت گردی کی عدالت نے کامران بنگش کی ضمانت منظور کرتے ہوئے انہیں رہا کرنے کا حکم دےدیا، عدالت نے کامران بنگش کو 2 لاکھ روپے کے مچلکے جمع کرانے کا بھی حکم دیا۔
دوسری جانب ضمانت پر رہائی سے قبل ہی پولیس نے کامران بنگش کو دوسرے مقدمے میں گرفتار کرلیا، کامران بنگش کو ڈی آئی خان پولیس کے حوالے کردیا گیا، کامران بنگش پر ڈی آئی خان میں عوام کو اشتعال دلانے کا الزام ہے۔
پولیس کا موقف ہے کہ پی ٹی آئی رہنماء اور سابق صوبائی وزیر کامران بنگش کے خلاف ایک اور ایف آئی ار درج ہے، ایف آئی ار ضلع ڈی آئی خان میں محمد اعجاز نامی شہری کی مدعیت میں درج کی گئی ہے، کامران بنگش نے لانگ مارچ میں لوگوں کو اپنے ساتھ اسلحہ لانے کے لیے اکسایا اور بغاوت پیدا کرنے کے لیے اداروں کے خلاف ہرزہ سرائی کی۔