یہ وقت اپنی ٹیم کی حوصلہ افزائی کرنے کا ہے حمزہ شہباز
اس وقت حوصلہ افزا طرز عمل اور مثبت پہلوؤں کو اجاگر کرنا قومی ٹیم کے مفاد میں ہے، رہنما ن لیگ
سابق وزیراعلیٰ پنجاب حمزہ شہباز نے قومی کرکٹ کی حمایت کرتے ہوئے کہا ہے کہ یہ وقت اپنی ٹیم کی ہمت بندھانے اور حوصلہ افزائی کرنے کا ہے۔
اپنے بیان میں رہنما مسلم لیگ ( ن ) نے کہا ہے کہ قومی کرکٹ ٹیم بھارت میں ورلڈ کپ کھیلتے ہوئے اپنی بھرپور صلاحیتیں دکھا رہی ہے، ایسے موقع پر حوصلہ شکن رویوں سے پرہیز کرنا چاہیے۔
انہوں نے کہا کہ دنیائے کرکٹ کے سب سے بڑے مقابلے میں نبرد آزما گرین شرٹس کے حوالے سے ذمے دارانہ رویہ اپنانا چاہیے۔
حمزہ شہباز نے کہا کہ اس وقت حوصلہ افزا طرز عمل اور مثبت پہلوؤں کو اجاگر کرنا قومی ٹیم کے مفاد میں ہے۔ انہوں نے کہا کہ شاہینوں کی کامیابی کے لیے پوری قوم دعاگو ہے۔
خیال رہے کہ بھارت میں جاری کرکٹ ورلڈ کپ میں پاکستانی ٹیم اب تک کھیلے گئے 7 میچوں میں سے 4 میں شکست کھاچکی ہے، اور پوائنٹس ٹیبل پر پانچویں پوزیشن پر ہے جس کی وجہ سے ٹیم کی سیمی فائنل تک رسائی تقریباً ناممکن دکھائی دے رہی ہے۔
خراب کارکردگی کی وجہ سے قومی ٹیم اور کپتان بابراعظم کو تنقید کا نشانہ بنایا جارہا ہے۔