غزہ سے1 ہزار زخمی بچوں کو علاج کیلیے متحدہ عرب امارات بلائیں گے شیخ زاید
غزہ میں 9 ہزار کے قریب شہادتوں اور 22 ہزار سے زائد زخمیوں میں نصف تعداد بچوں اور خواتین کی ہیں
متحدہ عرب امارات کے صدر شیخ محمد بن زاید آل نھیان نے اعلان کیا ہے کہ غزہ سے ایک ہزار زخمی بچوں کو علاج کی غرض سے دبئی اور ابوظہبی کے بڑے اسپتالوں میں لایا جائے گا۔
عالمی خبر رساں ادارے کے مطابق متحدہ عرب امارات کے صدر نے مزید کہا کہ ان بچوں کے ساتھ ان کے اہل خانہ کو بھی خوش آمدید کہا جائے گا اور مکمل علاج تک یہ لوگ امارات میں ہی قیام کریں گے۔
صدر شیخ محمد بن زاید آل نھیان کے حکم کی تعمیل میں اماراتی وزیرِ خارجہ نے ریڈ کراس کی صدر سے رابطہ کیا اور زخمی فلسطینی بچوں کو علاج کی غرض سے متحدہ عرب امارات لانے کے طریقہ کار کو حتمی شکل دی۔
یہ خبر پڑھیں : اسرائیل کی پناہ گزین کیمپ پر وحشیانہ بمباری؛ 200 فلسطینی شہید اور 700 زخمی
دوسری جانب اماراتی وزیرِ خارجہ شیخ عبداللّٰہ بن زاید نے غزہ میں خوراک اور طبی امداد کی ترسیل کی ضرورت پر زور دیتے ہوئے کہا کہ جنگ زدہ علاقوں میں امدادی کارکنوں کی نقل و حرکت کو محفوظ بنایا جائے۔
یہ خبر بھی پڑھیں : حماس سرنڈر کرے یا مرنے کو تیار رہے، تیسرا کوئی آپشن نہیں؛ اسرائیل
واضح رہے کہ غزہ پر اسرائیلی بمباری میں 8 ہزار 700 سے زائد شہادتیں ہوچکی ہیں اور 22 ہزار سے زائد زخمی ہیں۔ ہلاک اور زخمی ہونے والوں میں نصف تعداد بچوں اور خواتین کی ہیں۔