بالی ووڈ کے کنگ خان دنیا کے دوسرے امیر ترین اداکار بن گئے

بالی ووڈ کے کنگ خان 60 کروڑ ڈالر کما کر دوسرے نمبر پر براجمان ہیں۔ فوٹو: فائل

---

بالی ووڈ میں اپنی اداکاری کے باعث کنگ خان کا خطاب پانے والے شاہ رخ خان کو دنیا کا دوسرا امیر ترین اداکار ہونے کا اعزاز بھی حاصل ہوگیا ہے۔

بھارتی میڈیا کے مطابق ''ویلتھ ایکس'' نامی ادارے کی جانب سے ہالی ووڈ اور بالی ووڈ کے امیر ترین اداکاروں کی مشترکہ فہرست جاری کی گئی جس کے مطابق کامیڈین اداکار جیری سینفیلڈ 82 کروڑ ڈالر کما کر دنیا کے پہلے امیر ترین اداکار ہیں جبکہ بالی ووڈ کے کنگ خان 60 کروڑ ڈالر کما کر اس فہرست میں دوسرے نمبر پر براجمان ہیں اور بالی ووڈ انڈسٹری کے ساتھ ساتھ دنیا بھر میں یکساں مقبول ہیں۔

فہرست میں تیسرا نمبر معروف ہالی ووڈ اداکار ٹام کروز کا ہے جو اب تک 48 کروڑ ڈالرز کما چکے ہیں، جوہنی ڈیپ اور ٹیلر پیری 45 کروڑ ڈالر کمائی کے ساتھ چوتھے اور پانچویں، کئی اکیڈمی اور آسکر ایوارڈ یافتہ 77 سالہ جیک نکولسن 40 کروڑ ڈالرز کے ساتھ چھٹے، آسکر ایورڈ یافتہ ٹام ہینکس 39 کروڑ ڈالر کے ساتھ ساتویں، 38 کروڑ ڈالرز کے ساتھ بل کوسبے آٹھویں، 84 سالہ کلنٹ ایسٹ ووڈ 37 کروڑ ڈالرز کے ساتھ نویں جبکہ ایڈم سینڈلر 34 کروڑ ڈالرز کے ساتھ اس فہرست میں دسویں نمبر پر موجود ہیں۔