کراچی میں موبائل فونزکے آئی ایم ای آئی نمبر تبدیل کرنے والا گروہ گرفتار

186 موبائل فونز،12 لیپ ٹاپ اور186 ٹیبلٹ برآمد

Staff Reporter November 06, 2023

186 موبائل فونز،12 لیپ ٹاپ اور186 ٹیبلٹ برآمد

ایس آئی یو پولیس نےخفیہ اطلاع پرایم اے جناح روڈ پہلوی ریسٹورنٹ کے قریب کارروائی کرتے ہوئے شہر کے مختلف علاقوں سے چھینے وچوری کیئے جانے والے موبائل فونزکے آئی ایم ای آئی نمبرتبدیل کرکے فروخت کرنے والے گروہ کے2 کوگرفتار کرکے ان کے قبضے سے مختلف وارداتوں میں چھینے و چوری کیے گئے 186 موبائل فونز،12 لیپ ٹاپ اور186 ٹیبلٹ برآمد کرلیے۔

گزشتہ روزایس ایس پی اسپیشل انویسٹی گیشن یونٹ جنید شیخ نے اپنے دفترمیں پریس کانفرنس کرتے ہوئے بتایا کہ ایس آئی یو پولیس نے خفیہ اطلاع پرایم اے جناح روڈ پہلوی ریسٹورنٹ کے قریب کارروائی کرتے ہوئے شہر کے مختلف علاقوں سے چھینے و چوری کیئے جانے والے موبائل فونزکے آئی ایم ای آئی نمبرتبدیل کرکے فروخت کرنے والے گروہ کے 2 ملزمان حبیب اللہ ولد غلام محمد اور سلیمان ولد وزیرزادہ کوگرفتارکرکے ان کے قبضے سے مختلف وارداتوں میں چھینے و چوری کیے گئے186 موبائل فونز،12 لیپ ٹاپ اور 186 ٹیبلٹ برآمد کر لیے۔

ایس ایس پی مزید کہا کہ گرفتارملزمان 10 سے زائد اسٹریٹ کرمنلز گینگ سے رابطہ میں تھےاور گرفتار ملزمان اسٹریٹ کرمنلز گینگ سے چھینے و چوری کیے جانے والے موبائل فونز نہ صرف سستے داموں میں خریدتے تھے بلکہ ان کے آئی ایم ای آئی نمبر تبدیل کرکے موبائل فونزعام شہریوں کو مارکیٹ میں فروخت کردیا کرتے تھے

انھوں نے بتایا کہ گرفتارملزمان جدید ڈیوائسز کے ذریعے آئی ایم ای آئی نمبر تبدیل کیا کرتے تھے انھوں نے بتایا کہ گرفتارملزمان گزشتہ ایک سال سے موبائل فونز کے آئی ایم ای آئی نمبر تبدیل کرنے کا کام کر رہے تھے اوراس دوران انھوں نے ان جائزہ دھندے سے لاکھوں روپے کمائے گرفتارملزمان پہلی مرتبہ پکڑے گئے ہیں۔

ایس ایس پی نے مزید بتایاکہ گرفتار ملزمان موبائل فون کے آئی ایم ای آئی نمبرتبدیل کرنے کے3 سے 5 ہزارروپے لیا کرتے تھے،انھوں نے بتایا کہ گرفتارملزمان سے برآمد موبائل فون کے حیقیقی مالکان کو تلاش کیا جا رہا ہے جہنیں ان کے موبائل فونزواپس کر دیئے جائیں گے۔

ایس ایس پی نے کہا کہ تاجر تنظیموں نے گرفتارملزمان کی وارداتوں سے لاتعلقی کا اظہار کیا ہے،گھروں میں ڈکیتی کی وارداتوں میں 9 گروہ متحرک ہیں جن میں5 کے کیسز ایس آئی یومنتقل ہوئے ہیں اورایس آئی یو پولیس نے حال ہی میں ڈیفنس کے بنگلے میں 50 لاکھ روپے کی ڈکیتی میں ملوث ملزمان کوگرفتارکیا ہے،گھروں میں ڈکیتیوں میں ملوث ملزمان غیرمقامی ہوتے ہیں جوکہ زیادہ ترگھریلو ملازموں سے ملکروارداتیں کرتے ہیں۔

انھوں نے بتایا کہ حالیہ دنوں میں بھتہ خوری کے واقعات میں کمی واقع ہوئی ہے،زیادہ تربھتہ خورگروہ بیرون ملک ایران،افغانستان اورمسقط سے آپریٹ ہوتے ہیں اوران کے کارندے سہولیات کار واردات انجام دیتے تھے۔