کراچی میں ڈمپر کی ٹکر سے 3 موٹر سائیکل سوارجاں بحق
پولیس نے ڈرائیور کو گرفتار کر کے ڈمپر قبضے میں لے لیا ہے، ایس ایچ او گڈاپ سٹی
سپر ہائی وے ٹول پلازہ رینجرز چوکی کے قریب ڈمپر نے موٹر سائیکل سواروں کو روند ڈالا جس کے نتیجے میں 3 افراد جاں بحق جبکہ ایک شخص شدید زخمی ہوگیا۔
تفصیلات کے مطابق حادثے کے شکار زخمیوں اور متوفین کی لاشوں کو ایدھی اور چھیپا کے رضا کاروں ںے عباسی شہید ہسپتال پہنچایا، ریسکیو حکام کے مطابق جاں بحق ہونے والوں کی شناخت 28 سالہ احسن اور 27 سالہ زوہیب کے نام سے کی گئی جبکہ شدید زخمی ہونے والے 2 افراد کو عباسی اسپتال سے اسٹیڈیم روڈ پر قائم نجی اسپتال منتقل کیا گیا جہاں 40 سالہ ذیشان زخموں کی تاب نہ لاتے ہوئے دم توڑ گیا جبکہ شدید زخمی 45 سالہ شہزاد کو طبی امداد فراہم کی جا رہی ہے جس کی حالت تشویشناک بتائی جاتی ہے دونوں افراد ایک موٹر سائیکل پر سوار تھے۔
ایس ایچ او گڈاپ سٹی زوار حسین نے بتایا کہ حادثہ تیز رفتار ڈمپر کی ٹکر سے پیش آیا تھا جس کی اطلاع ملنے پر پولیس نے موقع پر پہنچ کر ڈرائیور کو گرفتار کر کے ڈمپر اپنے قبضے میں لے لیا ہے۔
پولیس کے مطابق جاں بحق ہونے والا ذیشان اور اس کے ساتھ زخمی شہزاد ناظم آباد دو نمبر کے رہائشی ہیں جبکہ متوفی ذیشان کی لیاقت آباد میں پرندوں کی دکان ہے جبکہ حادثے میں جاں بحق ہونے والے زوہیب اور احسن دوسری موٹر سائیکل پر سوار اور نیو کراچی سیکٹر فائیو ای کے رہائشی تھے جو کہ کاٹھور کے قریب باڑے پر کام کرتے تھے اور گھر جا رہے تھے کہ حادثے کا شکار ہوگئے ، موٹر سائیکل پر 3 افراد سوار تھے جس میں تیسرا شخص جو موٹر سائیکل چلا رہا تھا وہ متوفی زوہیب کا ماموں ہے جو کہ حادثے میں معجزانہ طور پر محفوظ رہا۔