ڈی آئی خان میں نجی کمپنی کے قافلے پر دہشتگردوں کا حملہ دو ملازمین اور فوجی جوان شہید

علاقے میں موجود دہشت گردوں کے خاتمے کے لیے آپریشن کیا جا رہا ہے، آئی ایس پی آر

Staff Reporter/ November 14, 2023

(فوٹو : ویڈیو اسکرین شاٹ)

خیبرپختونخوا کے ضلع ڈیرہ اسماعیل خان کے علاقے درازندہ میں نامعلوم دہشت گردوں نے گیس اینڈ آئل کمپنی کے قافلے پر فائرنگ کی جس کے نتیجے میں 2 ملازمین جاں بحق، سپاہی شہید اور 12 افراد زخمی ہوگئے۔

پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق ضلع ڈیرہ اسماعیل خان (ڈی آئی خان) کے علاقے درازندہ میں دہشت گردوں نے علاقے میں ترقیاتی منصوبے پر کام کرنے والی نجی کمپنی کی گاڑیوں پر فائرنگ کی۔

جس کے نتیجے میں دو ملازمین محمد فیصل (عمر 35 سال) اور آصف کامران (عمر: 29 سال) ضلع کرک کے رہائشیوں نے شہادت کو گلے لگا لیا۔

مزید پڑھیں: شمالی وزیرستان میں فورسز کی دہشت گردوں کیخلاف کارروائی میں 2 سپاہی شہید

آئی ایس پی آر کے مطابق پروجیکٹ کی حفاظت پر مامور سپاہی سید محمد شاہین شاہ (عمر: 33 سال، رہائشی: ضلع ہنگو) نے بھی بہادری سے لڑتے ہوئے شہادت کو گلے لگا لیا۔

ریسکیو1122 ڈیرہ اسماعیل خان

سب ڈویژن درازندہ میں گیس ڈرلنگ کمپنی کانوائے پرحملہ، ایک اہلکار موقع پر جانبحق جبکہ 12 افراد زخمی

ریسکیو1122 میڈیکل ٹیموں نے تمام زخمیوں کو درازندہ ٹائپ ڈی ہسپتال منتقل کردیا، 2 شدید زخمیوں کو ٹائپ ڈی درازندہ سے ڈی ایچ کیو ڈیرہ منتقل کر دیا گیا pic.twitter.com/qwsXjIC9CA

- KP_Rescue1122 (@KPRescue1122) November 13, 2023

آئی ایس پی آر کے مطابق علاقے میں موجود دہشت گردوں کے خاتمے کے لیے آپریشن کیا جا رہا ہے۔ پاکستان کی سیکیورٹی فورسز دہشت گردی کی لعنت کے خاتمے کے لیے پرعزم ہیں اور علاقے کی معاشی ترقی کے لیے تعاون جاری رکھیں گی۔

دوسری جانب سیکیورٹی فورسز نے 13 نومبر 2023 کو ضلع خیبر کے علاقے باڑہ میں انٹیلی جنس پر مبنی آپریشن کیا جس کے نتیجے میں ایک دہشت گرد ہلاک ہوا، جس کی شناخت قدرت شاہ عرف ابوبکر کے نام سے ہوئی ہے۔

مارے گئے دہشت گرد کے قبضے سے اسلحہ اور گولہ بارود بھی برآمد ہوا، جو دہشت گردوں کی متعدد کارروائیوں میں سرگرم رہا۔