کراچی پولیس کا جعلی انجن آئل کے گودام پر چھاپہ

امپورٹڈ کمپنیز کی برانڈنگ والے پلاسٹک کین ، بوتلیں ، سیلیں ، ڈھکن ، کارٹن ، برآمد

Staff Reporter November 14, 2023

امپورٹڈ کمپنیز کی برانڈنگ والے پلاسٹک کین ، بوتلیں ، سیلیں ، ڈھکن ، کارٹن ، برآمد

بلدیہ ٹاؤن پولیس نے بلدیہ 3 نمبر دہلی کالونی میں جعلی انجن آئل کی پیکنگ میٹریل کے گودام پر چھاپہ مار کر بڑی تعداد میں امپورٹڈ کمپنیز کی برانڈنگ والے پلاسٹک کین ، بوتلیں ، سیلیں ، ڈھکن ، کارٹن ، پلاسٹک دانہ اور دیگر سامان برآمد کرلیا

ایس ایس پی کیماڑی عارف اسلم راؤ نے بتایا کہ برآمد کیے جانے والے پلاسٹک کین ، بوتلیں اور کارٹن میں جعلی انجن آئل پیک کر کے شہر بھر میں جعلی آئل کے ڈیلروں کو سپلائی کیا جاتا ہے ،

چھاپے کے دوران جعلی انجن آئل بنانے والے گودام سے بوتلیں اور کین بنانے میں استعمال کیے جانے والے پلاسٹک دانے کے 20 بورے برآمد ہوئے ہیں جن کا مجموعی وزن 500 کلو ہے ،

انھوں نے بتایا کہ مذکورہ گودام بدنام زمانہ ندیم ابا اور نوید ابا نامی جعلی آئل ڈیلرز کا ہے اور چند ہفتے قبل بلدیہ پولیس نے انہی دونوں کی جعلی انجن آئل بنانے والی فیکٹری اور گودام پر چھاپہ مار کر بڑی تعداد میں جعلی انجن آئل سمیت مشینری ، پیکنگ مٹیریل ، اسٹیکرز اور دیگر سامان برآمد کیا تھا ، بلدیہ پولیس نے پیکنگ گودام پر چھاپے اور سامان کی برآمدگی کے حوالے سے مقدمہ درج کرلیا تاہم اس حوالے سے کوئی گرفتاری عمل میں نہ آسکی۔