نانا پاٹیکر نے مداح کو تھپڑ مارنے پر ہاتھ جوڑ کر معافی مانگ لی

نانا پاٹیکر نے کہا کہ "مجھے لگا تھا کہ وہ نوجوان ہماری ٹیم کا حصہ ہے اور میں نے اُسے تھپڑ ماردیا لیکن جب مجھے پتا چلا کہ وہ میرا مداح تھا تو میں نے اُسے ڈھونڈا لیکن وہ اُس وقت وہاں سے بھاگ چکا تھا"۔

اداکار نے کہا کہ "اُس مداح کے کسی دوست نے ویڈیو بنائی اور سوشل میڈیا پر شیئر کردی لیکن میں نے جان بوجھ کر تھپڑ نہیں مارا، میں نے اپنے کیریئر میں کبھی بھی کسی مداح کے ساتھ ایسا سلوک نہیں کیا"۔

مزید پڑھیں: نانا پاٹیکر نے سیلفی لینے پر مداح کو تھپڑ جڑ دیا، ویڈیو وائرل

اُنہوں نے کہا کہ "میں اُس مداح سے ہاتھ جوڑ کر معافی مانگ رہا ہوں جسے میں نے تھپڑ مارا، میں اپنے دیگر مداحوں سے بھی معافی مانگ رہا ہوں، مجھے معاف کردیں، یہ سب انجانے میں ہوا"۔

واضح رہے کہ بھارتی میڈیا کے مطابق فلم "دی ویکسین وار" کے بعد نانا پاٹیکر اپنی اگلی فلم کی شوٹنگ میں مصروف ہیں اور اسی شوٹنگ کے دوران مداح کو تھپڑ مارنے کا واقعہ پیش آیا۔