شاہ رخ خان مایوس بھارتی ٹیم کو تسلی دینے میدان میں آگئے

یہ ایک کھیل ہے جس میں ہار جیت ہوتی رہتی ہے، شاہ رخ خان

ویب ڈیسک November 20, 2023

آسٹریلیا ناقابل شکست بھارت کو ہرا کر چھٹی بارکرکٹ کا عالمی چیمپئن بن گیا : فوٹو: ویب ڈیسک

بالی ووڈ کنگ شاہ رخ خان نے آئی سی سی ورلڈ کپ 2023 کا فائنل ہارنے والے مایوس بھارتی کرکٹرز کو تسلی دیتے ہوئے اُن کی حوصلہ افزائی کردی۔

احمد آباد کے نریندر مودی کرکٹ اسٹیڈیم میں کھیلے گئے آئی سی سی ورلڈ کپ 2023ء کے فائنل میں بھارت کو 6 وکٹوں سے شکست دیکر آسٹریلیا چھٹی بار کرکٹ کا عالمی چیمپئن بن گیا۔

بھارت کی شکست کے بعد بالی ووڈ کے میگا اسٹار شاہ رخ خان نے اپنی ٹیم کی حوصلہ افزائی کرنے کے لیے سماجی رابطے کی ویب سائٹ ایکس (سابق ٹوئٹر) پر خصوصی پیغام جاری کیا۔

The way the Indian team has played this whole tournament is a matter of honour and they showed great spirit and tenacity. It's a sport and there are always a bad day or two. Unfortunately it happened today....but thank u Team India for making us so proud of our sporting legacy in...

- Shah Rukh Khan (@iamsrk) November 19, 2023

شاہ رخ خان نے اپنی پوسٹ میں کہا کہ "بھارتی ٹیم نے جس جذبے اور لگن کے ساتھ یہ پورا ٹورنامنٹ کھیلا وہ اعزاز کی بات ہے، تمام کھلاڑیوں نے زبردست جذبے اور ثابت قدمی کا مظاہرہ کیا"۔

اداکار نے کہا کہ "یہ ایک کھیل ہے جس میں ہار جیت ہوتی رہتی ہے، ہمیشہ جیت نہیں ملتی، کوئی دن ایسا بھی ہوتا ہے جب ٹیم کو شکست کا سامنا کرنا پڑتا ہے اور فائنل میں ایسا ہی ہوا، ہم ہار گئے لیکن ہم اس شکست کے باوجود بھی بھارتی ٹیم کے شُکرگزار ہیں جنہوں نے شاندار کھیل کا مظاہرہ کرتے ہوئے ہمیں فخر محسوس کروایا"۔

مزید پڑھیں: فائنل میں شکست؛ انوشکا شرما کا دل شکستہ کوہلی کو دلاسہ

اُنہوں نے بھارتی ٹیم کی حوصلہ افزائی کرتے ہوئے مزید کہا کہ "آپ نے پورے بھارت کو بہت زیادہ خوشی بخشی ہے اور ہمیں ایک قابلِ فخر قوم بنایا ہے"۔

واضح رہے کہ بھارت کی یہ ٹورنامنٹ میں پہلی شکست تھی، بھارتی ٹیم ورلڈ کپ میں اپنے تمام 9 لیگ میچز میں کامیابی کے بعد سیمی فائنل میں بھی کامیاب ہوئی تھی تاہم فائنل میں کینگروز نے بھارتی ارمانوں پر پانی پھیر دیا۔

مزید پڑھیں: ''فلسطینیوں پر بمباری بند کرو'' ورلڈکپ فائنل کے دوران تماشائی گراؤنڈ میں آگیا

یاد رہے کہ آئی سی سی ورلڈ کپ 2023ء کے فائنل میں بھارت کا 241 رنز کا ہدف آسٹریلیا نے 43 اوورز میں چار وکٹوں کے نقصان پر بنایا، ٹریوس ہیڈ مین آف دی میچ جبکہ ویرات کوہلی ٹورنامنٹ کے بہترین کھلاڑی قرار پائے۔