آئی ایم ایف تجاویز پر عملدرآمد کا تسلسل معاشی بحالی کیلیے ضروری

نگران حکومت موثر اقدامات کے ذریعے آئی ایم ایف کا اعتماد حاصل کرنے میں کامیاب رہی

Express Tribune Report November 20, 2023

حکومتی اقدامات کی وجہ سے کرنٹ اکاؤنٹ خسارہ بھی کم ہوکر معمولی سا رہ گیا (فوٹو: فائل)

نگران حکومت نے آئی ایم ایف کو مطمئن کرنے کیلیے متعدد اقدامات کیے اور بالآخر عالمی مالیاتی فنڈ کو مطمئن کرنے میں کامیاب رہی، لیکن اس اطمینان کو برقرار رکھنے کیلیے ابھی بہت سا سفر طے کرنا باقی ہے۔

ممکنہ طور پر حکومت کو اگلے تین سے چار سالوں تک آئی ایم ایف کی ضرورت رہے گی، اس لیے آئی ایم ایف کی تجاویز پر تیزی سے عملدرآمد ضروری ہے۔

نگران حکومت مختصر عرصے میں اسپیشل انویسٹمنٹ فیسلیٹیشن کونسل کے موثر استعمال، سازگار موسم کی وجہ سے زرعی پیداوار میں اضافے، کروڈ آئل کی قیمتوں میں استحکام، ترسیلات زر میں اضافے، اسمگلنگ اور غیر قانونی کرنسی ایکسچینج کے خلاف کریک ڈاؤن اور ٹیکسوں میں اضافے جیسے اقدامات کے نتیجے میں آئی ایم ایف کا اعتماد حاصل کرنے میں کامیاب رہی۔

یہ بھی پڑھیں: پاکستان اور آئی ایم ایف کے درمیان 70 کروڑ ڈالر کی قسط کیلیے معاہدہ طے پا گیا

ان موثر اقدامات کی وجہ سے کرنٹ اکاؤنٹ خسارہ بھی کم ہوکر معمولی سا رہ گیا، جس کا خاتمہ معیشت کی بحالی کی طرف پیش قدمی کو ممکن بنا دے گا۔

تاہم، مستقبل میں مشکلات سے بچنے کیلیے ضروری ہے کہ حکومت آئی ایم ایف کی تجاویز پر فوری طور پر عمل کرے اور تجویز کردہ اقدامات کو عملی جامہ پہنانے کیلیے کسی قسم کی تاخیر کا شکار نہ ہو، تاکہ معاشی بحالی کے عمل کا تسلسل جاری رہے اور ملکی معیشت بدحالی کے چنگل سے باہر نکل سکے۔