بھارتی فوج کی ریاستی دہشت گردی میں کشمیری نوجوان شہید

بھارتی فوج نے نوجوان کو ضلع راجوڑی میں نام نہاد سرچ آپریشن کی آڑ میں فائرنگ کرکے قتل کیا

ویب ڈیسک November 22, 2023

نوجوان کو ضلع راجوڑی میں سرچ آپریشن کی آڑ میں قتل کیا گیا، فوٹو:فائل

مقبوضہ کشمیر میں بھارتی فوج نے نام نہاد سرچ آپریشن کی آڑ میں ایک کشمیری نوجوان کو گولیاں مار کر شہید کردیا۔

عالمی خبر رساں ادارے کے مطابق بھارتی فوج نے سرچ آپریشن ضلع راجوڑی میں کیا۔ علاقے کے داخلی اور خارجی راستوں کو بند کرکے گھر گھر تلاشی لی۔ خواتین کے ساتھ بدتمیزی کی گئی اور بزرگوں تک کو تشدد کا نشانہ بنایا گیا۔

سرچ آپریشن کے دوران جارحیت پسند بھارتی فوج نے ایک گھر پر اندھا دھند فائرنگ کردی جس کے نتیجے میں ایک نوجوان موقع پر ہی شہید ہوگیا جس کی شناخت ظاہر نہیں کی گئی۔

قابض بھارتی فوج نے انسانی حقوق کی سنگین خلاف ورزی کرتے ہوئے لاش لواحقین کے حوالے کرنے سے بھی انکار کردیا۔ والدین اپنے پیارے کی لاش کے حصول کے لیے دربدر کی ٹھوکریں کھانے پر مجبور ہیں۔

علاقہ مکینوں نے بھارتی فوج کی جارحیت کے خلاف احتجاجی مظاہرہ کا جس میں جدوجہد آزادیٔ کشمیر کے حق میں نعرے بازی کی گئی۔ مظاہرین نے بینرز اُٹھا رکھے تھے جس میں بھارتی فوج کے خلاف نعرے درج تھے۔