بابراعظم کو کبھی ناکامیوں کا ذمہ دار نہیں ٹھہرایا بورڈ کی وضاحت

اس کا یہ مطلب نہیں کہ آپ سلیکشن کمیٹی کے دیگرارکان کی رائے کو نظر انداز کردیں، ڈائریکٹر میڈیا پی سی بی

Sports Reporter November 23, 2023

اس کا یہ مطلب نہیں کہ آپ سلیکشن کمیٹی کے دیگرارکان کی رائے کو نظر انداز کردیں، ڈائریکٹر میڈیا پی سی بی (فوٹو: ایکسپریس ویب)

پاکستان کرکٹ بورڈ (پی سی بی) نے سابق کپتان بابراعظم کو شکستوں کا ذمہ دار ٹھہرانے کے حوالے سے بیان جاری کردیا۔

ورلڈکپ کے دوران بورڈ کی جانب سے جاری کی جانے ہونے والی ایک متنازع پریس ریلیز میں سابق کرکٹرز کی تنقید کے جواب میں کہا گیا تھا کہ ہار جیت کھیل کا حصہ ہے، اسکواڈ کی تشکیل میں کپتان بابراعظم اور چیف سلیکٹر انضمام الحق کو فری ہینڈ دیا گیا تھا، اگلے فیصلے ورلڈکپ میں ٹیم کی پرفارمنس کو پیش نظر رکھتے ہوئے پاکستان کرکٹ کے مفاد میں کیے جائیں گے۔

اس حوالے سے بات کرتے ہوئے پی سی بی کی ڈائریکٹر میڈیا عالیہ رشید نے کہا ہے کہ ورلڈکپ کے دوران بورڈ نے کبھی بابراعظم پر تنقید یا ان کو ذمہ دار ٹھہرانے کی کوشش نہیں کی، بابراعظم ایک قابل قدر کرکٹر اور آزادانہ مزاج رکھتے ہیں۔

مزید پڑھیں: ''بابراعظم کی ٹی20 اسکواڈ میں جگہ نہیں بنتی''

کپتان میں یہ خاصیت ہونا بھی چاہیے مگر اس کا یہ مطلب نہیں کہ آپ سلیکشن کمیٹی کے دیگرارکان کی رائے کو نظر انداز کردیں۔

مزید پڑھیں: حارث رؤف کیخلاف کوئی انتقامی کارروائی نہیں ہوگی، بورڈ کا دو ٹوک اعلان

اس پریس ریلیز میں یہ ضرور کہا گیا تھا کہ ٹیم بابراعظم اور انضمام الحق نے منتخب کی اور یہ بات درست بھی ہے، بابراعظم کسی ایک کھلاڑی کے حوالے سے بھی فیصلہ تبدیل کرنے کو تیار نہیں تھے اور بورڈ نے اس کو سپورٹ بھی کیا، کوئی مانے یا نہیں، حقیقت یہی ہے۔