کراچی شارٹ ٹرم کڈنیپنگ میں ملوث برطرف پولیس اہلکارسمیت 2 ملزمان گرفتار

گرفتار ملزمان شہریوں کو مختصر مدت کے لیے اغوا کر کے اہل خانہ سے تاوان وصول کرتے تھے، ترجمان ڈسٹرکٹ ویسٹ پولیس

Staff Reporter November 23, 2023

گرفتار ملزمان کی شناخت پولیس سے برطرف کیے جانے والے احسان فاروقی ولد خلیل احمد اور اس کے ساتھی واحد بلوچ کے نام سے کی گئی

اورنگی ٹاؤن پولیس نے شارٹ ٹرم کڈنیپنگ میں ملوث پولیس کے برطرف اہلکار سمیت 2 ملزمان کو گرفتار کرلیا۔

ترجمان ڈسٹرکٹ ویسٹ پولیس کے مطابق اورنگی پولیس نے خفیہ ذرائع سے ملنے والی اطلاع پر چھاپہ مار کارروائی کر کے اغوا برائے تاوان میں ملوث دونوں ملزمان کو گرفتار کرلیا۔

گرفتار ملزمان کے خلاف اسپیشل برانچ سے بھی شارٹ ٹرم کڈنیپنگ کے حوالے سے انٹیلیجنس رپورٹ ( آئی آر) پولیس کو موصول ہوئی تھی۔

گرفتار ملزمان کی شناخت پولیس سے برطرف کیے جانے والے احسان فاروقی ولد خلیل احمد اور اس کے ساتھی واحد بلوچ کے نام سے کی گئی۔

ترجمان کے مطابق گرفتار ملزمان خود کو پولیس اہلکار ظاہر کر کے سادہ لوح افراد کو مختصر مدت کے لیے اغوا کر کے اہلخانہ سے تاوان وصول کرتے تھے۔

ملزمان نے رواں سال 8 اکتوبر کو اورنگی ٹاؤن کے علاقے بلوچ گوٹھ سے شہری مراد کو اغوا کیا اور اس کے اہلخانہ سے رہائی کے عوض 70 لاکھ روپے تاوان وصول کیا جس کا مقدمہ اورنگی ٹاؤن تھانے میں اغوا برائے تاوان کی دفعہ 365 اے کے تحت درج ہے۔

ترجمان کا کہنا ہے کہ گرفتار ملزمان کو قانونی کارروائی مکمل کرنے کے بعد مزید تفتیش کے لیے اینٹی وائلنٹ کرائم سیل پولیس کے حوالے کر دیا گیا ہے۔