محبوبہ سے جھگڑے کے بعد خود کو گولی مار کر ڈکیتی کا ڈرامہ رچانے والا گرفتار
ملزم نے محبوبہ سے جھگڑا ہونے پر خود کو فائر مارا، گھر والوں سے چھپانے کے لیے ڈکیتی کا بیان دیا، ایس ایچ او شیخ عمران
پولیس نے مددگار 15 پر کال کرکے دوران ڈکیتی خود کو گولی لگنے کا ڈرامہ کرنے والے کو گرفتار کرلیا، ملزم نے محبوبہ سے جھگڑے کے سبب خود کو گولی ماری تھی۔
ایکسپریس نیوز کے مطابق گزشتہ رات مددگار 15 پر پولیس کو شہری عثمان کی فون کال موصول ہوئی کہ لیاقت آباد میں دوران ڈکیتی اسے گولی لگی ہے، پولیس نے ملزم کو اسپتال منتقل کیا، جائے وقوع سے شواہد جمع کیے اور ملزم سے تفتیش کی تو اس نے جھوٹ بولنے کا اعتراف کرلیا۔
ایس ایچ او شیخ عمران کے مطابق ملزم نے بتایا کہ اسے محبوبہ سے جھگڑا ہونے کے باعث اس نے خود کو فائر مارا تھا، گھر والوں سے چھپانے کے لیے معاملے کو ڈکیتی کا رنگ دینے کی کوشش کی۔
ایس پی ماڈل ٹاؤن ارتضی کمیل کے مطابق ملزم عثمان کے خلاف مددگار 15 پر جھوٹی کال کرنے پر مقدمہ درج کرکے اسے انویسٹی گیشن پولیس کے حوالے کردیا گیا ہے، مددگار 15 پر جھوٹی کالز کرنے والے کسی رعایت کے مستحق نہیں۔