آرمی چیف خیرپور ٹامیوالی پہنچ گئے بہاولپور کور کی فیلڈ مشقوں کا مشاہدہ

آرمی چیف خیرپور ٹامیوالی کا دورہ کرتے ہوئے (فوٹو : سرکاری میڈیا)

---

پاک فوج کے سربراہ جنرل سید عاصم منیر نے کہا ہے کہ ہم چیلنجز سے باخبر ہیں، پاک فوج کی پوری توجہ مادر وطن کی سرحدوں کے دفاع پر مرکوز ہے، قوم کی حمایت سے مسلح افواج پاکستان کے دشمنوں کو شکست دے گی۔

آئی ایس پی آر کے مطابق آرمی چیف بہاولپور کور کی فیلڈ مشقوں کامشاہد ہ کرنے کے لیے خیرپور ٹامیوالی پہنچ گئے۔ ان کی آمد پر کور کمانڈر بہاولپور نے استقبال کیا، عاصم منیر نے ٹامیوالی میں بہاولپور کور کی فیلڈ مشقوں کا مشاہدہ کیا جہاں انہیں فیلڈ مشقوں کے بارے میں بریفنگ دی گئی، مشقوں کا مقصد آپریشنل ماحول میں مستقبل کے چیلنجوں سے نمٹنے کے لیے مہارت کو بڑھانا ہے۔

آئی ایس پی آر نے کہا ہے کہ آرمی چیف نے مشق میں حصہ لینے والے ٹروپس سے بات چیت کی اور ہر حال میں روایتی جوش اور جذبے کے ساتھ قوم کی خدمت کرتے رہنے کی ہدایت کی۔ آرمی چیف نے کہا کہ انشااللہ قوم کی حمایت سے مسلح افواج پاکستان کے دشمنوں کو شکست دے گی۔

آئی ایس پی آر کے مطابق آرمی چیف جنرل سید عاصم منیر نے اپنے دورے کے دوران آرمر، میکانائزڈ انفنٹری، آرٹلری، ایئر ڈیفنس اور اینٹی ٹینک گائیڈڈ میزائل کا بھی مشاہدہ کیا۔