واردات کیلئے جانے والا ڈاکو اتفاقیہ طور پر زخمی ہوکر گرفتار

ڈاکو اپنے ایک ساتھی کے ہمراہ موٹرسائیکل پر واردات کی نیت سے جا رہا تھا کہ ساتھی کے پستول سے اتفاقیہ طور پر گولی چل گئی

Staff Reporter December 06, 2023

نارتھ ناظم آباد بلاک بی میں فائرنگ سے ایک شخص زخمی ہوگیا۔

پولیس کا کہنا ہے کہ زخمی ہونے والا شخص ڈاکو ہے جو اپنے ہی ساتھی کے ساتھ موٹرسائیکل پر واردات کی نیت سے جاتے ہوئے ساتھی کی پستول سے اتفاقیہ گولی چلنے سے زخمی ہوا ہے ، اسے پولیس نے اسپتال سے گرفتار کر لیا۔

نارتھ ناظم آباد کے علاقے بلاک بی صائمہ برج کے فائرنگ سے ایک شخص زخمی ہوگیا ، جسے طبی امداد کے لیے عباسی شہید اسپتال منتقل کیا گیا۔

زخمی کی شناخت 25 سالہ اقبال ولد احسن کے نام سے کی گئی ، اس کے متضاد بیانات پر پولیس نے واقعے کی تحقیقات کی اور جائے وقوعہ پہنچ کر اس کی موٹرسائیکل برآمد کر کے قبضے میں لے لی۔

جائے وقوعہ سے عینی شاہدین کے بیانات لینے کے بعد پولیس نے زخمی کو باقاعدہ حراست میں لے کر سختی سے بیان لیا تو اس نے بتایا کہ وہ ڈکیت گینگ کا کارندہ ہے۔

واقعے کے وقت وہ اپنے ایک ساتھی کے ہمراہ موٹرسائیکل پر واردات کی نیت سے جا رہا تھا کہ اس کے ساتھی کے پستول سے اتفاقیہ طور پر گولی چل گئی تھی جس سے وہ زخمی ہوا۔

واقعے کے بعد اس کا ساتھی موقع سے فرار ہوگیا ، پولیس فرار ہونے والے ڈٓاکو کی تلاش میں چھاپے مار رہی ہے ۔