کراچی آرجےشاپنگ مال آتشزدگی کی تحقیقاتی رپورٹ مرتب بلڈنگ مالک ذمہ دار قرار

شاپنگ مال میں آگ بجلی کی تاریں اسپارک کرنے سے لگی اور ناقص معیارکی الیکٹریکل اورفال سیلنگ تنصیبات سے پھیلی

Sajid Rauf December 12, 2023

شاپنگ مال میں آگ بجلی کی تاریں اسپارک کرنے سے لگی اور ناقص معیارکی الیکٹریکل اورفال سیلنگ تنصیبات سے پھیلی

راشد منہاس روڈ پر واقع شاپنگ مال میں پیش آئے خوفناک آتشزدگی کے واقعے کے 18 روز کےبعد تحقیقاتی کمیٹی نے اپنی رپورٹ مرتب کرلی۔

رپورٹ میں بتایا گیا کہ شاپنگ مال میں آگ بجلی کی تاریں اسپارک کرنے سے لگی اور ناقص معیارکی الیکٹریکل اورفال سیلنگ تنصیبات سے آتشزدگی پھیلی، آگ چوتھی منزل پر واقعے کیفے ٹیریا میں لگی تھی۔

شاپنگ مال میں فائرایگزٹ اورہنگامی حالات سے نمٹنے کے لیے آلات نہ ہونے کے باعث زیادہ نقصان ہوا،بلڈرنے عمارت میں تعیمراتی کا مکمل ہونے کا سرٹیفیکیٹ حاصل نہیں کیا۔

فیصل کنٹونمنٹ بورڈ نے بھی عمارت کی تکمیل اورفائرسیفٹی سسٹم موجود ہونے کی یقین دہانی نہیں کی، عمارت کی چوتھی منزل پر لفٹ کو بہترایئرکنڈیشنگ کیلئے سیل کر دیا گیا تھا۔ ضابطے کے مطابق عمارت میں خود کارفائرسیفٹی کا نظام بھی موجود نہیں تھا۔

عمارت میں آتشزدگی سے ہونے والے نقصان کی ذمہ دار بلڈنگ کا مالک، انتظامیہ،اے آئی فاؤنڈیشن پرعائد ہوتی ہے، رپورٹ میں شاپنگ مال کے مالک، انتظامیہ،اے اینڈ آئی فاؤنڈیشن کے خلاف قانونی چارہ جوئی کی سفارش کی گئی ہے۔

رپورٹ کے مطابق بلڈرنے عمارت میں تعمیراتی کام مکمل ہونے کا سرٹیفیکیٹ حاصل کئے بغیر دکانیں دکانداروں کے حوالے کیں۔

رپورٹ میں حادثے میں زخمی اورجاں بحق ہونے والوں کوقانون( دیت )کے مطابق معاوضہ دینے کی سفارش کی گئی۔

پولیس ذرائع کے مطابق ڈی آئی جی ایسٹ غلام اظفر مہیسر نے تحقیقاتی رپورٹ ایڈیشنل آئی جی کراچی کو ارسال کردی ہے۔

واضح رہے کہ 25 نومبرکو آرجے شاپنگ مال میں خوفناک آتشزدگی کے واقعے میں 11 افراد جھلس کراوردم گھنٹے سے جاں بحق ہوئے تھے۔