فلسطینیوں کی شہادت کا مذاق اڑانا معروف فیشن برانڈ کو مہنگا پڑگیا

انٹرنیشنل فیشن برانڈ زارا کی جانب سے غزہ میں مظلوم فلسطینیوں کی شہادتوں کا مذاق اڑانے پر امریکا میں ہزاروں افراد نے آؤٹ لیٹ کے باہر کپڑے پھینک دیئے۔

سماجی رابطے کی سائٹ ٹوئٹر (ایکس) پر ویڈیو وائرل ہورہی ہے جس میں دیکھا جاسکتا ہے کہ ہزاروں کی تعداد میں مہنگے ترین فیشن برانڈ کے کپڑے سڑک پر پڑے ہیں۔

گزشتہ دنوں سوشل میڈیا پر معروف فیشن برابڈ زارا نے ایک اشتہاری مہم چلائی تھی جس میں اسرائیلی جارحیت میں شہید فلسطینیوں کا مذاق اڑایا گیا تھا، فوٹو شوٹ میں ماڈل نے سفید کپڑے میں لپٹی ہوئی لاش کا مجسمہ اپنے کندھے پر اُٹھایا ہوا تھا۔

تبصرہ نگاروں نے ان اشتہارات پر تنقید کرتے ہوئے کہا تھا کہ اشہتاری تصاویر سفید کفنوں میں ڈھکے ہوئے غزہ میں اجتماعی قبروں میں مرنے والوں کی تصاویر سے مشابہت رکھتی ہیں۔

مزید پڑھیں: بائیکاٹ مہم کامیاب، فیشن برانڈ 'زارا' نے متنازعہ فوٹو شوٹ پر معذرت کرلی

فیشن برانڈ کی اشہاری تصاویر سوشل میڈیا پر وائرل ہوئیں تو بائیکاٹ مہم زور پکڑ گئی اور دنیا بھر میں فلسطین کے حمایتی افراد نے برانڈ کے خلاف احتجاج ریکارڈ کروایا۔