عراق میں بم دھماکوں اور فائرنگ کے واقعات میں 27 افراد ہلاک 34 زخمی

خودکش حملہ آور نے امام بارگاہ کے گیٹ پر پہنچ کر خود کو دھماکے سے اڑالیا۔ فوٹو: اے ایف پی

---

عراق میں خودکش حملے سمیت بم دھماکوں اور فائرنگ کے نتیجے میں 27 افراد ہلاک جب کہ 34 زخمی ہوگئے۔

غیر ملکی خبر رساں ایجنسی کے مطابق دارالحکومت بغداد میں امام بارگاہ کے باہر نماز ظہر کے وقت خودکش حملہ آور نے خود کو مرکزی دروازے کے باہر دھماکے سے اڑالیا جس کے نتیجے میں 19 افراد ہلاک اور 34 زخمی ہوگئے، ابتدائی طور پر کسی بھی گروپ نے واقعے کی ذمہ داری قبول نہیں کی تاہم حکام کی جانب سے خدشہ ظاہر کیا جارہا ہے کہ خودکش حملہ القاعدہ سے منسلک تنظیم ''دولت اسلامیہ عراق یا جہادی گروپ'' کے افراد کی جانب سے کیا گیا۔

دوسرا دھماکا بغداد کے ہی علاقے صدر سٹی اور دورا کے درمیان سڑک کنارے نصب بم پھٹنے سے ہوا جس کے نتیجے میں 2 افراد ہلاک ہوئے جبکہ عراق میں دہشت گردی سے سب سے زیادہ متاثرہ شمالی شہر موصل میں فائرنگ کے مختلف واقعات میں 6 افراد ہلاک ہوئے۔