اے این ایف کارروائیوں میں 348 کلو منشیات برآمد کرلی گئی

اے این ایف حکام نے منشیات برآمد کرکے مقدمات درج کرلیے

---

اے این ایف نے مختلف کارروائیوں میں مجموعی طور پر 348 کلو منشیات برآمد کرلی۔

ترجمان اینٹی نارکوٹکس فورس کے مطابق منشیات اسمگلنگ کے خلاف کارروائیاں ملک بھر میں جاری ہیں۔ اس دوران 5 مختلف آپریشنز میں 348 کلوگرام سے زائد منشیات برآمد کرکے ایک ملزم کو گرفتار کرلیا گیا۔

علامہ اقبال انٹرنیشنل ائرپورٹ پر ایک کارروائی کے دوران مسافر کے پیٹ سے 36 آئس بھرے کیپسول برآمد کرلیے گئے۔ ملزم پرواز نمبر QR-0621 کے ذریعے دوحا کے لیے روانہ ہو رہا تھا۔

دوسری کارروائی پشین کے علاقے کلی میرجان زئی میں کی گئی، جہاں ایک مکان سے 312 کلو گرام افیون برآمد کرلی گئی۔ علاوہ ازیں زخہ خیل خیبر سے 26 کلو اور ڈیرہ اسماعیل خان سے 7.2 کلو چرس برآمد کی گئی۔

اُدھر لاہور گلبرگ تھری میں واقع کوریئر آفس میں کوہاٹ کے لیے بُک کیے گئے پارسل سے 3.3 کلو آئس برآمد کرلی گئی۔ گرفتار ملزم کے خلاف انسدادِمنشیات ایکٹ کے تحت مقدمہ درج کر کے تحقیقات کا آغاز کر دیا گیا ہے۔