ایران پولیس اسٹیشن پر مسلح افراد کے حملے میں 11 اہلکار ہلاک اور متعدد زخمی

ایران نے حملے کی ذمہ داری جیش العدل نامی علیحدگی پسند عسکری جماعت پر عائد کی ہے، فوٹو: فائل

---

ایران کے جنوب مغربی علاقے راسک ٹاؤن میں مسلح افراد نے پولیس اسٹیشن پر دھاوا بول دیا اور اندھا دھند فائرنگ کی جس کے نتیجے میں 11 افراد ہلاک اور متعدد زخمی ہوگئے۔

ایران کے سرکاری میڈیا کے مطابق یہ حملہ صوبہ سیستان بلوچستان میں سرگرم علیحدگی پسند گروپ نے کیا۔ پولیس کی جوابی کارروائی میں متعدد حملہ آور بھی مارے گئے۔

ایرانی صوبے سیستان بلوچستان کے نائب گورنر علی رضا مرحمتی نے حملے کی ذمہ داری جیش العدل نامی علیحدگی پسند جماعت پر عائد کرتے ہوئے بتایا کہ پولیس اسٹیشن پر حملے میں سینئر پولیس افسران اور سپاہی مارے گئے۔

یاد رہے کہ حالیہ چند ماہ میں علیحدگی پسند عسکری جماعتوں کا نشانہ پولیس تھانے رہے ہیں۔ ایران میں 3 سے زائد علیحدگی پسند جماعتیں فوج، پاسداران انقلاب اور سیکیورٹی بارڈر فورس پر حملوں میں ملوث رہی ہیں۔

جیش العدل کا نام اُس وقت سامنے آیا جب 2019 میں ایک بس پر خودکش بم حملے میں ایران کی پاسدارانِ انقلاب فورس کے 27 اہلکار ہلاک ہوگئے تھے اور جیش العدل نے ذمہ داری قبول کی تھی۔