دنیا کا خوبصورت ترین اُڑنے والا کیڑا
اس پیکاسو موتھ کے ڈیزائن کا مقصد سائنسدانوں کو ابھی تک واضح نہیں ہوسکا ہے
اُڑنے والے حشرات جنہیں انگریزی میں moths کہا جاتا ہے، میں پیکاسو موتھ کو دنیا کا خوبصورت ترین اُڑنے والا قرار دیا گیا ہے۔
اس کیڑے کا ویسے تو سائنسی نام Baorisa hieroglyphica ہے لیکن اس کے خوبصورت ڈیزائن کی وجہ سے اس کا نام تاریخ کے بڑے مصور پیکاسو کے نام سے منسوب کرکے اس کا نام پیکاسو موتھ رکھا گیا ہے۔
اس کا ذکر پہلی بار ایک برطانوی ماہر حشرات فریڈرک مور نے 1882 میں کیا۔ یہ موتھ جنوبی مشرقی ایشا اور شمالی ہندوستان میں پایا جاتا ہے۔
یہ موتھ عمومی طور پر رات کو متحرک ہوتا ہے جبکہ اس کی خوراک مختلف پیڑ پودوں سے نکلنے والا رس ہوتا ہے۔
اگرچہ منفرد ڈیزائن یا جسامت کے حامل کیڑے اپنے دشمن جاندار کو ڈرانے، الجھانے یا اردگرد کے ماحول میں خود کو ڈھالنے کیلئے اپنے جسم پر بنے ڈیزائن کا استعمال کرتے ہیں تاہم اس پیکاسو موتھ کے ڈیزائن کا مقصد ابھی تک واضح نہیں ہوسکا ہے۔