بابراعظم کی کپتانی کیسے گئی ذکا اشرف کی مبینہ آڈیو لیک

مبینہ آڈیو میں مینجمنٹ کمیٹی کے سربراہ نے پلئیر ایجنٹ سے متعلق انکشافات کردیئے

ویب ڈیسک December 19, 2023

مبینہ آڈیو میں مینجمنٹ کمیٹی کے سربراہ نے پلئیر ایجنٹ سے متعلق انکشافات کردیئے (فوٹو: ایکسپریس ویب)

پاکستان کرکٹ بورڈ (پی سی بی) کی مینجمنٹ کمیٹی کے سربراہ ذکا اشرف کی بابراعظم کو کپتانی سے ہٹانے سے متعلق مبینہ آڈیو منظر عام پر آگئی۔

سماجی رابطے کی سائٹ ٹوئٹر(ایکس) پر ایک مبینہ آڈیو سوشل میڈیا پر وائرل ہورہی ہے جس میں پاکستان کرکٹ بورڈ (پی سی بی) کی مینجمنٹ کمیٹی کے سربراہ ذکا اشرف ورلڈکپ میں ناقص پرفارمنس کے بعد بابراعظم کی کپتانی چھوڑنے سے متعلق اور شاہین کو محدود فارمیٹ میں قیادت کے فرائض سونپنے پر ایک نامعلوم خاتون سے گفتگو کررہے ہیں۔

ذکا اشرف کو بابراعظم کی کپتانی سے متعلق کہتے ہوئے سنا جاسکتا ہے کہ انہیں دو فارمیٹ کی کپتانی چھوڑنے کیلئے کہا گیا تھا جس پر بابر نے جواب دیا کہ میں فیملی سے مشورہ کرکے بتاؤں گا لیکن فیملی کے بجائے انہوں نے طلحہ (نامی) پلئیر ایجنٹ سے بات کی اور بعدازاں تینوں فارمیٹ سے کپتانی چھوڑنے کا اعلان کیا۔

انہوں نے مزید کہا کہ پلئیر ایجنٹ نے ٹیم کے 8 کھلاڑیوں کو گھیرا ہوا ہے، اس کے کھلاڑیوں کے ساتھ فیملی ٹرم ہیں۔

مزید پڑھیں: شاہین آفریدی ٹی20 اور شان مسعود ٹیسٹ کپتان مقرر، حفیظ ٹیم ڈائریکٹر ہوں گے

مینجمنٹ کمیٹی کے سربراہ نے مزید کہا کہ بابراعظم نے ٹیسٹ کی کپتانی لینے سے انکار کیا تو اسوقت ہمارے پاس پلان بی تیار تھا ہم نے شان مسعود کو کپتانی دیدی اور شاہین کو ٹی20 فارمیٹ میں قیادت کے فرائض سونپے۔ اس موقع پر نامعلوم خاتون نے کہا کہ شاہین بھی تو اپنے سُسر شاہد آفریدی کے کنٹرول میں ہے۔

انہوں نے کہا کہ حسن علی بابر اعظم کے ساتھ دوستی کی وجہ سے پاکستانی سکواڈ کا حصہ بنے ہوئے ہیں۔

Breaking News
فاختہ چئیرمین پی سی بی مینجمنٹ کمیٹی ذکاء اشرف صاحب کی مبینہ آڈیو منظر عام پر لے آئی. کیسے انہوں نے پلاننگ کی.کیسے محمد رضوان کو وائیٹ بال کی کپتانی نہ کرنے دی.بابر اعظم کے خلاف کونسا پلان بی تیار تھا فاختہ سب منظر عام پر لے آئی،،،@TalhaAisham
پر الزام عائد کیا کہ... pic.twitter.com/Uh83UwKfQU

- Qadir Khawaja (@iamqadirkhawaja) December 18, 2023