ملک میں بینک صارفین کی شکایات کے ازالے کیلیے پورٹل ’سنوائی‘ کا آغاز
صارفین بینکاری پروڈکٹ یا سہولت کے بارے میں اپنی شکایات ’سنوائی‘ کے ذریعے درج کراسکتے ہیں، اسٹیٹ بینک
اسٹیٹ بینک نے بینک صارفین کی شکایات کے ازالے کے لیے پورٹل 'سنوائی' کا آغاز کر دیا۔
ترجمان اسٹیٹ بینک کے مطابق پورٹل 'سنوائی' بینکوں کے صارفین کے لیے ون ونڈو آپریشن کی حیثیت رکھتا ہے جہاں وہ پاکستان میں کام کرنے والے بینکوں، مائکرو فنانس بینکوں اور ترقیاتی مالی اداروں (ڈی ایف آئیز) کے خلاف اپنی شکایات درج کرا سکتے ہیں۔
ترجمان کے مطابق اب صارفین روشن ڈجیٹل اکاؤنٹس (آر ڈی اے) سمیت کسی بھی بینکاری پروڈکٹ یا سہولت کے بارے میں اپنی شکایات 'سنوائی' کے ذریعے درج کراسکتے ہیں تاکہ ان کا بروقت ازالہ کیا جا سکے۔
واضح رہے کہ 'سنوائی'ویب براؤزر کے علاوہ موبائل ایپلی کیشن کے ذریعے بھی اینڈرائڈ اور آئی او ایس دونوں پر قابلِ رسائی ہے۔ رجسٹرڈ صارفین اپنی آسانی کے مطابق انگریزی یا اردو زبان میں شکایات درج کرا سکتے ہیں۔