سی سی آئی نے صوبوں کو ملنے والی رقم سے بجلی کے بقایا جات کی کٹوتی کی منظوری دیدی

RAWALPINDI:
مشترکہ مفادات کونسل نے یکم جولائی سے صوبوں کو ملنے والی رقم سے بجلی کے بقایا جات کی کٹوتی کی منظوری دے دی۔


وزیر اعظم نواز شریف کی صدارت میں اسلام آباد میں مشترکہ مفادات کونسل کا اجلاس ہوا جس میں چاروں وزرائے اعلیٰ، وفاقی وزرا اور سیکریٹریز شریک ہوئے۔ اجلاس کے دوران صوبوں نے وزارت پانی وبجلی کی جانب سے 25 فیصد فوری ادائیگیوں کی کٹوتی پر اتفاق کرلیا، کونسل نے صوبوں کے بقایا جات 60 دن میں ادا کرنے، پاکستان انرجی ایفی شینسی اینڈ کنزرویشن بل اور وژن 2025 کی بھی منطوری دے دی۔

اجلاس میں کچی کینال کرپشن کیس کی تحقیقات پر بھی غور کیا گیا، اس موقع پر وزیراعظم نے کچی کینال منصوبے کی تحقیقات میں تاخیر پر ناراضگی کا اظہار کرتے ہوئے کیس کی تحقیقات انٹرنیشنل آڈیٹرز کے ذریعے کرانے کا فیصلہ کیا، اس کے علاوہ ایگزیکٹیو مجسٹریسی ایکٹ میں ترمیم کی بھی منظوری دی گئی جس کےتحت مجسٹریسی نظام کو بحال کیا جائے گا۔ ایگزیکٹو مجسٹریسی ایکٹ میں ترمیم کے لئے صوبے 15 دن میں تجاویز بھجوائیں گے۔