نرگس فخری بالی ووڈ کے بعد تامل فلم میں بھی آئٹم سانگ کریں گی

ہالی ووڈ فلم ’’اسپائی‘‘ میں ایکشن کردار نبھارہی ہیں، فلم کی تشہیر کے لیے دوسرے اداکاروں کے ساتھ مختلف ممالک کا دورہ کروں گی۔ فوٹو : فائل

---

فلم ''راک اسٹار'' سے بالی وود میں قدم رکھنے والی اداکارہ نرگس فخری اب ایک تامل فلم کے آئٹم سانگ پر پرفارم کرکے ساؤتھ کے سینما پر بھی اپنی اداؤں کا جادو چلائیں گی۔

بھارتی میڈیا کے مطابق 34 سالہ نرگس جو بالی ووڈ فلموں مدراس کیفے میں جان ابراہام اور '' میں تیرا ہیرو''ورون دھون کے ساتھ مرکزی کردار نبھا چکی ہیں تامل فلم ساہسم میں معروف اداکار پرشانت کے ساتھ ایک آئٹم سانگ پر پرفارم کریں گی۔ اطلاعات کے مطابق اس گانے کی کوریو گرافی کے فرائض بھارت کے مایہ ناز کوریوگرافر نبھائیں گے۔ فلم کے پروڈیوسر تھائیگرجان (Thiagarajan) کا کہنا ہے کہ نرگسی فخری 13 جون کو یہاں آئیں گی اور ہم کچھ دنوں تک اس گانے کی ریہرسل کریں گے جس کے بعد گانے کو عکس بند کیاجائے گا اس موقع پر نرگس اور فلم کے ہیرو پرشانت کے ساتھ 50 دوسرے ڈانسر بھی پرفارم کریں گے۔

اطلاعات کے مطابق نرگس فخری جو ہالی ووڈ فلم ''اسپائی'' میں بھی کام کررہی ہیں ان دنوں امریکا ملیزا مک کارتھی ،جیسن سٹتھم ، روسی بریان اور جوڈلا کے ساتھ کی عکسبندی میں مصروف ہیں کا اس فلم کے متعلق کہنا ہے کہ پال فگ کی ہدایتکاری میں بنائی جانیوالی فلم ''اسپائی'' میں میرا کردار ایک جاسوسہ کا ہے جو ایکشن سے بھر پور ہے اور میں اپنے حصے کا کام کافی حد تک مکمل کروا چکی ہوں۔

ایک سوال کے جواب میں اداکارہ کا کہنا تھا کہ میری عدم موجودگی میں بھارتی میڈیا میں بہت کچھ کہا جاچکا ہے مگر ان میں سے کئی باتوں کا حقیقت سے کوئی تعلق نہیں ہے۔ میں ہدایتکار کے کہنے اور اس کی مرضی سے ہی فلم میں اپنی پرفارمنس دکھا رہی ہوں اور یہاں سب میرے کام سے مطمئن ہیں۔ نرگس فخری کا کہنا تھا کہ فلم اسپائی آئندہ برس سینما گھروں کی زینت بنائی جائے گی مگر اس سے قبل دنیا کے مختلف ممالک میں اس کی تشہری مہم چلائی جائے گی اور میں بھی اس موقع پر ان ممالک میں جاکر تقریبات میں حصہ لوں گی۔