فلسطینیوں سے اظہار یکجہتی آسٹریلوی وزیراعظم نے بھی عثمان خواجہ کی حمایت کردی

میں (خواجہ) کو جرات مندی پر مبارکباد دینا چاہوں گا جس نے انسانی اقدار کے لیے کھڑے ہوکر دکھایا، اینتھونی البانی (فوٹو: ایکسپریس ویب)

---

اسرائیلی جارحیت کیخلاف غزہ کے مظلوم فلسطینیوں کی حمایت میں عثمان خواجہ کے ردعمل پر آسٹریلوی وزیراعظم نے بھی کرکٹر کی حمایت کردی۔

پاکستان کیخلاف تین میچوں کی سیریز کے پہلے میچ سے قبل پریکٹس سیشن کے دوران آسٹریلوی اوپنر عثمان خواجہ نے فلسطینیوں کے حق میں آواز بلند کرنے والے جوتے پہن ٹریننگ کی تھی، جس میں فلسطینی عوام سے ہمدردی کے نعرے درج تھے۔

عثمان خواجہ کی فلسطینیوں سے اظہار یکجہتی کرتے ہوئے جوتے پر لکھا ہوا تھا کہ آزادی سب کا حق اور تمام زندگیاں برابر ہیں۔ جس پر آئی سی سی نے موقف اپنایا تھا کہ کرکٹر کو میچ کے دوران مبینہ سیاسی پیغام والے جوتے پہننے کی اجازت نہیں دی جائے گی۔

مزید پڑھیں: عثمان خواجہ نے نئی سوشل میڈیا پوسٹ میں آئی سی سی کا دہرا معیار واضح کردیا

بعدازاں عثمان خواجہ نے سیاہ پٹی باندھ کر میچ کھیلا تھا اور اپنا پیغام پہنچایا تھا تاہم آئی سی سی نے اس پر بھی کرکٹر کیخلاف جرمانہ عائد کردیا تھا۔

دوسری جانب سڈنی ٹیسٹ میچ کے آغاز سے قبل آسٹریلو وزیراعظم اینتھونی البانی نے دونوں ٹیموں کے اعزاز میں عشائیہ رکھا تھا، اس موقع پر انہوں نے عثمان خواجہ کو سراہتے ہوئے کہا کہ میں (خواجہ) کو اس جرات کیلئے مبارکباد دینا چاہوں گا جس نے انسانی اقدار کے لیے کھڑے ہوکر دکھایا، اس نے ہمت کا مظاہرہ کیا ہے اور یہ حقیقت کہ ٹیم نے اس کی حمایت کی۔

مزید پڑھیں: آئی سی سی کا عثمان خواجہ کو بلے پر 'امن کا نشان' لگانے کی اجازت دینے سے انکار

آسٹریلوی وزیراعظم کے الفاظ نے جہاں عثمان خواجہ کو راحت فراہم کی ہے وہیں انکی درخواست پر کرکٹ آسٹریلیا کی اہم میٹنگ کے بعد انھیں رواں سیزن میں بگ بیش میچ کے دوران بیٹ پر امن کی فاختہ کی تصویر لگانے کی اجازت بھی دی۔