سزا سنانے پر مجرم نے خاتون جج پر بھری عدالت میں حملہ کردیا ویڈیو وائرل

امریکی بھری عدالت میں مجرم نے خاتون جج پر حملہ کردیا، فوٹو: ویڈیو گریب

---

امریکی عدالت میں خاتون جج نے جیسے ہی مجرم کو سزا سنائی وہ غصے سے بھپر گیا اور بھری عدالت میں جج پر حملہ کرکے تشدد کا نشانہ بنایا جس کی ویڈیو سوشل میڈیا پر وائرل ہوگئی۔

عالمی خبر رساں ادارے کے مطابق یہ واقعہ امریکی شہر لاس ویگاس کی ایک عدالت میں پیش آیا۔ خاتون جج میری کی ہولتھس نے تشدد کے ایک کیس میں ملزم ڈیوبرا ریڈن کو قید کی سزا سنائی۔

سزا سنتے ہی مجرم اپنی جگہ سے بھاگتے ہوئے آیا اور خاتون جج کی سیٹ پر چھلانگ لگا کر انھیں نیچے گرا دیا اور تشدد کا نشانہ بنانے کی کوشش کی۔ وہاں موجود سیکیورٹی آفیسر نے مجرم کو پکڑ لیا۔

Man attacks Las Vegas judge at sentencing pic.twitter.com/nMaJUVapW3

- Daily Loud (@DailyLoud) January 3, 2024

مجرم نے سیکیورٹی اہلکاروں کے ساتھ بھی ہاتھا پائی جب کہ عدالتی عملہ خاتون جج کو حصار میں اپنے ہمراہ لے گیا۔ خاتون جج کی حالت خطرے سے باہر بتائی جا رہی ہے۔

خاتون جج پر حملے کے بعد بھی مجرم نے ڈھٹائی کا مظاہرہ کرتے ہوئے کہا کہ مجھے معمولی بات پر قید کی سزا نہیں دینی چاہیے تھی اگر جج کے لیے مجھے جیل بھیجنا مناسب تھا تو پھر مجھے بھی وہی کرنا تھا جو میں نے کیا۔

قبل ازیں سماعت کے آغاز پر پراسیکیوٹر نے خاتون جج کو بتایا تھا کہ ملزم ڈیوبرا ریڈن اہل خانہ پر تشدد کا مرتکب بھی پایا گیا ہے۔ جس پر جج نے کہا تھا کہ ڈومیسٹک وائیلنس ناقابل برداشت ہے۔