سابق پی ٹی آئی رہنما نجیب ہارون ایم کیو ایم پاکستان میں شامل

نجیب ہارون نے ایم کیو ایم پاکستان کے مرکز میں پارٹی میں شمولیت کا اعلان کیا۔فوٹو: فائل

---

پاکستان تحریک انصاف (پی ٹی آئی) کے بانی اراکین میں شامل سابق رکن قومی اسمبلی نجیب ہارون نےمتحدہ قومی موومنٹ(ایم کیو ایم) پاکستان میں شمولیت اختیار کرلی۔

نجیب ہاروں نے کراچی میں ایم کیو ایم پاکستان کے مرکزی الیکشن دفتر پاکستان ہاؤس میں ڈاکٹر خالد مقبول صدیقی، فاروق ستار، مصطفیٰ کمال اور دیگر سے ملاقات کے بعد پارٹی میں شمولیت کا باقاعدہ اعلان کیا۔

پی ٹی آئی کے سابق نائب صدر نجیب ہارون نے گزشتہ سال جولائی میں پی ٹی آئی چھوڑنے کا اعلان کیا تھا اور وہ 2018 میں کراچی سے رکن قومی اسمبلی منتخب ہوگئے تھے۔

مزید پڑھیں:کراچی سے پی ٹی آئی کے نجیب ہارون قومی اسمبلی کی رکنیت سے مستعفی

اس موقع پر ان کا کہنا تھا کہ میری 27 سال کی سیاسی جدوجہد رہی ہے، 9 مئی کے واقعات نے پاکستان کا تشخص خراب کیا ہے، اسی وجہ سے میں نے پی ٹی آئی کو خیرباد کہہ دیا تھا۔

نجیب ہارون نے کہا کہ میں اپنی استطاعت اور طاقت کے مطابق پاکستان کی خدمت کرتا رہوں گا، ایم کیوایم پاکستان کے کنوینر خالد مقبول صدیقی نے نجیب ہارون کو ایم کیو ایم کے پارٹی مفلر پہنایا۔