نیوزی لینڈ کیخلاف ٹی20 سیریز اوپنرز سے متعلق اہم تفصیلات سامنے آگئیں

کیویز کے خلاف میچز میں قومی ٹیم کا اوپننگ اسٹینڈ تبدیل ہونے کا امکان (فوٹو: ایکسپریس ویب)

---

نیوزی لینڈ کے خلاف 5 میچوں پر مشتمل ٹی20 سیریز کیلئے قومی ٹیم کے ممکنہ بیٹنگ آرڈر کی تفصیلات سامنے آگئیں۔

آکلینڈ میں ٹریننگ سیشن کے دوران جارح مزاج اوپنر صائم ایوب اور وکٹ کیپر بیٹر محمد رضوان نے نئی گیند کے ساتھ پریکٹس کی، جس سے تاثر مل رہا ہے کہ سیریز کے دوران دونوں کرکٹرز ہی بیٹگ کا آغاز کریں گے۔

اس سے قبل سابق کپتان بابراعظم اور محمد رضوان ٹی20 فارمیٹ میں اننگز کا آغاز کررہے تھے۔

مزید پڑھیں: ٹی20 سیریز؛ قومی ٹیم کے کون سے کھلاڑی نیوزی لینڈ جائیں گے

پریکٹس سیشن کے دوران پاکستانی باؤلرز کپتان شاہین آفریدی، حارث رؤف اور زمان خان نے محمد رضوان اور صائم ایوب کو نئی گیند سے بالنگ کروائی جبکہ بابراعظم کو اسپن کے خلاف بیٹنگ کرتے ہوئے دیکھا گیا۔

مزید پڑھیں: محمد رضوان پاکستان کی ٹی20 ٹیم کے نائب کپتان مقرر

کیویز کیخلاف ممکنہ طور پر بیٹنگ آرڈر میں رضوان اور صائم کو اوپننگ جوڑی کے طور پر شامل کیا جائے گا جبکہ بابراعظم اور فخر تیسری اور چوتھی پوزیشن سنبھالیں گے۔

اسی طرح اعظم خان بیٹنگ آرڈر میں پانچویں نمبر پر ہوں گے جبکہ افتخار احمد چھٹے نمبر پر فائر پاور فراہم کریں گے، تاہم حالات کے مطابق افتخار اور اعظم کی پوزیشنز کو تبدیل کیا جاسکتا ہے۔