آئی سی سی رینکنگ کوہلی کا چھٹی پوزیشن پر قبضہ بابراعظم کی 2 درجہ تنزلی

خراب فارم نے بابراعظم کو چھٹی سے 8ویں پوزیشن پر لاکھڑا کیا

ویب ڈیسک January 10, 2024

خراب فارم نے بابراعظم کو چھٹی سے 8ویں پوزیشن پر لاکھڑا کیا (فوٹو: ایکسپریس ویب)

سابق بھارتی کپتان ویرات کوہلی آئی سی سی ٹیسٹ رینکنگ میں تین درجے ترقی پاکر چھٹے نمبر پر آگئے، بابراعظم خراب فارم کے باعث دو درجہ تنزلی ہوگئی۔

آئی سی سی کی تازہ ٹیسٹ بیٹرز کی رینکنگ کے مطابق نیوزی لینڈ کے کپتان کین ولیمسن 864 ریٹنگ پوائنٹس کے ساتھ پہلی پوزیشن پر قابض ہیں جبکہ انگلینڈ کے جو روٹ 859 پوائنٹس کے ہمراہ دوسری پوزیشن پر موجود ہیں۔

پاکستان کیخلاف تین ٹیسٹ میچوں شاندار کھیل کا مظاہرہ کرنے والے اسٹیو اسمتھ اور مارنوس لبوشین بالترتیب تیسری اور چوتھی پوزیشن پر موجود ہیں، اسی طرح ویرات کوہلی جنوبی افریقہ کیخلاف رنز اُگل کر چھٹی پوزیشن پر آگئے ہیں انہوں نے بابراعظم کو پیچھے دھکیل دیا جو 768 ریٹنگ پوائنٹس کیساتھ 8ویں پوزیشن پر چلے گئے ہیں۔

مزید پڑھیں: دورہ آسٹریلیا بابر اعظم کیلیے ڈراؤنا خواب بن گیا

سڈنی ٹیسٹ کی پہلی اننگز میں محمد رضوان کی شاندار 88 رنز کی اننگز نے ان کے لیے 10 درجے کی نمایاں چھلانگ لگائی اور 668 ریٹنگ پوائنٹس کے ساتھ 17ویں رینک حاصل کی جبکہ سعود شکیل 693 ریٹنگ پوائنٹس کے ساتھ 14ویں نمبر پر چلے گئے۔

دوسری جانب بالنگ کے شعبے میں عامر جمال نے ڈیبیو سیریز میں ہی شاندار کھیل کا مظاہرہ کرکے 12 درجے ترقی حاصل کی اور وہ کیرئیر بیسٹ 45 ویں نمبر پر پہنچ گئے ہیں۔ شاہین آفریدی 733 پوائنٹس کے ساتھ 12ویں نمبر پر موجود ہیں۔