شمالی وزیرستان میں فائرنگ سے صوبائی اسمبلی کے امیدوار سمیت 3 افراد جاں بحق

نامعلوم افراد نے میرانشاہ کے علاقے میں فائرنگ کی۔فوٹو: فائل

---

خیبرپختونخوا کے علاقے میرانشاہ کے گاؤں تپی میں نامعلوم افراد کی فائرنگ سے صوبائی اسمبلی کے امیدوار سمیت 3 افراد جاں بحق ہوگئے۔

پولیس کے مطابق ضلع شمالی وزیرستان کی تحصیل میرانشاہ میں میں فائرنگ سے جاں بحق تین افراد میں حلقہ پی کے-104 سے انتخابات میں حصہ لینے والے آزاد امیدوار بھی شامل ہیں، جاں بحق افراد کی شناخت ملک کلیم اللہ ، مسرور اور محمد سخی کے نام سے ہوئی ہے۔

پولیس نے بتایا کہ ملک کلیم اللہ ساتھیوں کے ہمراہ اپنے گھر واپس جا رہے تھے کہ راستے میں ان پر فائرنگ کی گئی، لاشوں کو پوسٹ مارٹم کے لیے میرانشاہ ہسپتال منتقل کر دیا گیا ہے۔

الیکشن کمیشن آف پاکستان نے میرانشاہ میں صوبائی اسمبلی کے مذکورہ حلقے میں انتخاب کے حوالے سے وضاحت جاری کردی کہ پی کے- 104 میرانشاہ میں امیدوار کے انتقال سے الیکشن عمل پر کوئی اثر نہیں پڑے گا، سکیشن 73 کے تحت انتخابی مہم کا حصہ بننے والے امیدوار کے انتقال سے الیکشن ملتوی ہوتے ہیں۔

الیکشن کمیشن نے کہا کہ فارم 33 میں شامل ہونے اور انتخابی نشان جاری ہونے کے بعد امیدوار انتخابی عمل کا حصہ بن جاتے ہیں۔

انتخابات میں سیکیورٹی کے حوالے سے نگراں وزیر اعلیٰ خیبرپختونخوا سید ارشد حسین شاہ نے کہا ہے کہ صوبے کو 56 ہزار سیکیورٹی اہلکاروں کی کمی کا سامنا ہے جس کے لیے وفاق کو آگاہ کردیا ہے، مالی مسائل کے باجود پولیس کو مضبوط بنانے کے لیے اقدامات کر رہے ہیں۔