سپریم کورٹ کے جج جسٹس اعجاز الاحسن نے بھی استعفیٰ دے دیا

جسٹس اعجاز الاحسن سینیارٹی کے اعتبار سے اگلے چیف جسٹس ہوتے۔ فوٹو فائل

---

سپریم کورٹ آف پاکستان کے جج جسٹس اعجاز الاحسن بھی اپنے عہدے سے مستعفی ہوگئے ہیں۔

جسٹس اعجاز الاحسن نے اپنا تحریری استعفی صدر مملکت ڈاکٹر عارف علوی کو ارسال کیا۔ جس میں انہوں نے ذمہ داری دینے اور ادا کرنے پر مسرت کا اظہار کیا۔

جسٹس اعجاز الاحسن کے استعفے کے مندرجات

اپنے استعفے میں جسٹس اعجاز الاحسن نے لکھا کہ لاہورہائیکورٹ کے جج،چیف جسٹس اورسپریم کورٹ میں جج رہنے کا اعزازحاصل ہوا، اب میں سپریم کورٹ کے جج کے طور پر مزید خدمات انجام دینے کی خواہش نہیں رکھتا۔

مزید پڑھیں: سپریم کورٹ کے جج جسٹس مظاہر علی نقوی مستعفی

انہوں نے کہا کہ آئین کے آرٹیکل206 ون کے تحت جج سپریم کورٹ کے عہدے سے مستعفی ہو رہا ہوں۔

واضح رہے کہ آج جسٹس مظاہر نقوی کے خلاف ہونے والی سپریم جوڈیشل کونسل کے اجلاس کی کارروائی میں جسٹس اعجاز الاحسن نے بظور ممبر شرکت سے انکار کردیا تھا۔

یہ بھی پڑھیں : اعجاز الاحسن کے استعفے کے بعد سپریم جوڈیشل کونسل میں بڑی تبدیلی

 

چیئرمین قاضی فائز عیسیٰ کی زیر صدارت سپریم جوڈیشل کونسل کا اجلاس ہوا تو جسٹس سردار طارق مسعود ،چیف جسٹس بلوچستان ہائی کورٹ، چیف جسٹس لاہور ہائی کورٹ بطور رکن اجلاس میں شریک ہوئے تاہم ممبر جسٹس اعجاز الاحسن شریک نہیں ہوئے تھے۔

مزید پڑھیں: جوڈیشل کونسل؛ جسٹس اعجاز کا شرکت سے انکار، جسٹس منصور اجلاس میں شریک

جسٹس اعجاز الاحسن سپریم کورٹ میں سینیارٹی لسٹ میں جسٹس طارق کے بعد دوسرے نمبر پر تھے اور وہ انہیں آئندہ کے چیف جسٹس کا عہدہ سنبھالنا تھا۔

جسٹس اعجازالاحسن کے استعفے کے بعد اب جسٹس منصورعلی شاہ آئندہ چیف جسٹس پاکستان ہوں گے۔

جسٹس اعجاز الاحسن کا کریئر

جسٹس اعجاز الاحسن جون 2016 میں سپریم کورٹ کے جج تعینات ہوئے جبکہ نومبر 2015 میں وہ لاہور ہائیکورٹ کے چیف جسٹس کے عہدے پر تعینات ہوئے تھے۔

سپریم جوڈیشل کونسل کی کارروائی میں جسٹس مظاہر علی اکبر نقوی کا کوئی وکیل بھی اجلاس کے سامنے پیش نہ ہوا۔

چیف جسٹس نے سپریم جوڈیشل کونسل کے اجلاس میں اٹارنی جنرل کی جانب سے مظاہر نقوی کا استعفیٰ پڑھ کر سنانے کے بعد کہا کہ 'ہماری ساکھ داؤ پر لگی ہے اس معاملے کو ایسے ادھورا یا ہوا میں نہیں چھوڑ سکتے، اپنی کارروائی کو جاری رکھیں گے'۔

یہ بھی پڑھیں: جسٹس مظاہر کا معاملہ ہوا میں نہیں چھوڑ سکتے ہماری ساکھ بھی خطرے میں پڑی، جوٖڈیشل کونسل

اس سے قبل صدر مملکت نے آج صبح ہی جسٹس مظاہر نقوی کا استعفیٰ منظور کیا تھا۔