علم ِفلکیات کی روشنی میں آپ کا یہ ہفتہ

15تا21 جنوری 2024

---

برج حمل
سیارہ مریخ، 21 مارچ تا20اپریل
اس ہفتے کے ابتدائی ایام میں کیریئر کے حوالے سے چیزیں متحرک ہورہی ہیں۔ کچھ مشکلات آپ کو حواس باختہ کرنے کی کوشش کرسکتی ہیں۔ کئی الجھنوں سے سکون متاثر ہوسکتا ہے، لیکن آپ کا سیارہ اپنے شرف سے گزر رہا ہے۔ آپ کی توانائی کا گراف بلند رہے گا اور آپ ان حالات پر قابو پالیں گے۔ اس ہفتے کے درمیان یعنی بدھ اور جمعرات کو مالی فائدہ ہوسکتا ہے۔

برج ثور
سیارہ زہرہ ، 21اپریل تا 20 مئی
آپ کا سیارہ خوف و خدشات سے گزر رہا ہے، لیکن مشتری کا طالع سے گزرنا بتاتا ہے کہ آپ بظاہر ایک مشکل وقت میں ہونے کے باوجود کچھ کام یابیاں سمیٹ ہی لیں گے۔ عطارد اور مریخ بیرون ملک سفر اور اعلٰی تعلیم سے متعلقہ امور میں مثبت پیش رفت ظاہر کررہے ہیں۔ ہفتے کو کسی بزرگ سے ملاقات متوقع ہے۔

برج جوزا
سیارہ عطارد ، 21مئی تا 21 جون
آپ سیارہ ایک سرنگ میں داخل ہوچکا ہے، جہاں ممکن ہے کسی کان کی دریافت ہوجائے، لیکن ایسے وقت میں محتاط رہنے کی بھی ضرورت ہے۔ اعصابی نظام متاثر ہونے اور چہرے پر کوئی خراش آنے کا اندیشہ ہے۔ سفر میں احتیاط لازم رکھیں۔ اگر آپ کسی تحقیقی کام سے وابستہ ہیں تو امید ہے آپ کے کام کو سراہا اور دور تک پہچانا جائے گا۔

برج سرطان
سیارہ قمر ، 22جون تا 23 جولائی
آپ کے ساتویں خانے میں سیارگان کا اجتماع ممکنہ طور پر آپ کی کسی محفل میں شرکت کا پتا دیتا ہے۔ کسی اجنبی اور کسی آشنا سے ملاقات ہوسکتی ہے۔ ماتحت کام کرنے والے سے محتاط رہیں کسی نقصان کا اندیشہ ہے۔

برج اسد
سیارہ شمس ، 24جولائی تا 23 اگست
آپ کی تمام توجہ اپنے کام پر رہنے والی ہے جو مسائل ایک عرصے سے رکاوٹ کا سبب بنے ہوئے تھے اب وہ دور ہوتے دکھائی دے رہے ہیں۔ایسے وقت میں بزرگوں سے اختلافِ رائے کا کوئی پہلو نکلے تو خود پر قابو رکھیں، ان کی صحت کا خصوصی خیال رکھیں۔ نئی ملازمت کی پیشکش ہوسکتی یا نئے کام کی صورت حال بن سکتی ہے۔

برج سنبلہ
سیارہ عطارد ، 24 اگست تا 23 ستمبر
مالی حوالے سے یہ ہفتہ گذشتہ ہفتے کی نسبت بہتر ہے، لیکن مالی امور ابھی سخت رہ سکتے ہیں۔ بیرون ملک جانے کے حوالے سے آسانیاں متوقع ہیں۔ آپ کا طالع کا مالک محبت کے مقام پر ہے۔ یہاں اگلے ہفتے زہرہ بھی آنے والا ہے۔ نیا رشتہ بن سکتا ہے۔ منگنی شادی کے امکانات ہیں۔ یہ اچھا وقت ہوسکتا ہے۔

برج میزان
سیارہ زہرہ ، 24 ستمبر تا 23اکتوبر
آپ کا سیارہ تیسرے گھر میں ہے۔ متوقع اور غیرمتوقع فیصلے اور چھوٹے سفر درپیش ہوسکتے ہیں۔ مکان یا تو کرائے پر مل سکتا ہے اور اگر آپ اپنا مکان کرائے پر دینا چاہتے ہیں تو کرایہ دار مل جائے گا۔ نیا پلاٹ بھی آسان ادائی پر مل سکتا ہے۔ ایسے وقت میں سرخ یا زرد رنگ کی سواری کا حصول ممکن ہے۔

برج عقرب
سیارہ پلوٹو ، 24 اکتوبر تا 22 نومبر
آپ کے خانۂ مال میں زہرہ موجود ہے۔ پرانی پھنسی ہوئی رقم مل سکتی ہے۔ مریخ آپ کے تیسرے خانے میں موجود ہے۔ یہاں یہ بیرون ملک سفر کے حوالے سے آسانیاں لاسکتا ہے۔ جدی ایک سرد خشک برج ہے، اس لیے کام کچھ رک رک کے ہوںگے، لیکن ہوجائیں گے۔ 17 جنوری کو اولاد اور محبوب سے خوشی مل سکتی ہے۔

برج قوس
سیارہ مشتری ، 23 نومبرتا 22 دسمبر
اس ہفتے آپ کو غیرمتوقع طور پر ایک آمدن ہوتی ہوئی دکھائی دیتی ہے۔ یہ رقم تحفہ، انعام یا ایسا ہی کوئی اور سلسلہ ہوسکتا ہے۔ آپ کے خانۂ مال میں عطارد، مریخ، شمس اور پلوٹو کی موجودگی کے باعث خفیہ ذرائع سے آمدن ہونے لیکن وہیں خرچ ہونے کے بھی اشارے ہیں۔ آپ کی صحت اور کام اس ہفتے تیزی سے بہتر ہوتا ہوا نظر آتا ہے۔

برج جدی
سیارہ زحل ، 23 دسمبر تا 20 جنوری
گذشتہ دو ہفتوں سے جاری الٹی سیدھی سوچیں اس ہفتے ذہن سے نکل جائیں گی۔ آپ پلاٹ، زمین، مکان یا سواری کے لیے کوشاں ہوتے دکھائی دیتے ہیں اور اس میں آپ کو کام یابی بھی مل رہی ہے۔ کسی سے اس سلسلے میں معاہدہ بھی ہوسکتا ہے۔ کسی اجنبی سے اچھی ملاقات بھی متوقع ہے۔

برج دلو
سیارہ یورنیس ، 21 جنوری تا 19 فروری
چھوٹے بہن بھائی یا قریبی عزیزوں میں سے کسی کی صحت متاثر ہوسکتی ہے۔ اسپتال جانا پڑ سکتا ہے۔ والدہ کی صحت جو کچھ دنوں سے ہلکی ہلکی ناساز تھی ان کے سلسلے میں اس ہفتے کے آخر میں ڈاکٹر کے پاس جانا پڑسکتا ہے۔ اس ہفتے کسی قسم کا کوئی بڑا فیصلہ نہ کریں۔ کچھ ضروری نکات آپ کی نظروں سے اوجھل رہنے کی وجہ سے غلطی کا اندیشہ ہے۔

برج حوت
سیارہ نیپچون ، 20 فروری تا 20 مارچ
پرانے دوست اپنے تعلق کی تجدید کرتے ہوئے نظر آتے ہیں۔ اچھی ملاقاتیں اور رابطے ممکن ہیں۔ اس ہفتے ایک کام یابی لانے والا سفر بھی ہوسکتا ہے۔ آپ کی سنجیدگی پہلے کی نسبت بہت زیادہ بڑھ گئی ہے۔ اس کی وجہ گذشتہ دو سال کی مشقت اور الجھنیں ہیں، جس طرح آپ پہلے خطرات میں کود پڑتے تھے اس طرح اب نہیں کرتے گویا آپ کے اندر دوراندیشی آچکی ہے۔