پاکستانی ایئرلائنز کوایرانی فضائی حدود استعمال نہ کرنے کی ہدایت

سعودی عرب اور یو اے ای سے تمام پاکستانی ایئرلائنزکو مسقط کے روٹ سے پاکستان میں داخل ہونے کی ہدایت کی گئی ہے، سی اے اے

ویب ڈیسک January 18, 2024

غیرملکی ایئرلائنز بھی پاکستان آنے کیلیے ایرانی فضائی حدود کے استعمال سے گریز کررہی ہیں (فوٹو: فائل )

ایران کے ساتھ جاری کشیدگی کے پیش نظر تمام پاکستانی ایئرلائنز کو ایرانی فضائی حدود کے استعمال سے گریز کی ہدایت کردی گئی۔

سول ایوی ایشن اتھارٹی کے ذرائع کے مطابق پاک ایران جاری کشیدگی کے تناظر میں پی آئی اے سمیت تمام پاکستانی ایئرلائنز سے کہا گیا ہے کہ ایرانی فضائی حدود استعمال کرنے سے اجتناب کریں۔

سعودی عرب اور یو اے ای سے آنے والی پی آئی اے سمیت تمام پاکستانی ایئرلائنز کو مسقط کے روٹ سے بحیرہ عرب کے راستے پاکستان میں داخل ہونے کی ہدایت کی گئی ہے۔

غیر ملکی ایرلائنز بھی پاکستانی فضائی حدود میں داخل ہونے کے لیے ایرانی فضائی حدود سے گزرنے سے گریز کررہی ہیں، پاکستان ایئر ٹریفک کنٹرول تمام غیر ملکی اور ملکی ایئرلائنز کی محفوظ فضائی راستے کے لیے رہنمائی کر رہا ہے۔

سی اے اے کے ذرائع کے مطابق یورپی ملکوں، ترکیہ سمیت مغربی ممالک کی پاکستان آنے والی پروازیں بھی ایرانی فضائی حدود استعمال نہ کرنے کو ترجیح دے رہی ہیں۔