پاکستان ہاکی ٹیم پیرس اولمپک کوالیفائر کے سیمی فائنل میں پہنچ گئی
پاکستان اور ملائیشیا کا آخری پول میچ 3-3 گول سے برابر رہا، سیمی فائنل میں جرمنی سے مقابلہ ہوگا
پاکستان ہاکی ٹیم پیرس اولمپک کوالیفائر کے سیمی فائنل میں پہنچ گئی۔
پیرس اولمپکس ہاکی کوالیفائرز عمان کے دارالحکومت مسقط میں جاری ہے جہاں آخری پول میچ میں پاکستان اور ملائیشیا کا مقابلہ تین تین گول سے برابر رہا۔
پاکستان کی جانب سے سفیان، عماد بٹ اور رانا وحید جبکہ ملائشیا کی طرف سے صاری فطری، ابوکمال اور فرحان اشعری نے گول کئے۔
مزید پڑھیں: پیرس اولمپکس میں رسائی؛ قومی ٹیم کو ''اگر مگر'' کی صورتحال درپیش
پاکستان کے گول کیپر عبداللہ اشتیاق نے بہترین کھیل پیش کرتے ہوئے ایک پنالٹی اسٹروک روکنے کے ساتھ کئی یقینی گول بچائے۔
پاکستان نے اپنے گروپ میں چار پوائنٹس کے ساتھ دوسری پوزیشن پاکر سیمی فائنل تک رسائی پائی۔ برطانیہ گروپ میں پہلے نمبر پر رہا۔
سیمی فائنل جمعہ 20 جنوری کو پاکستانی وقت کے مطابق رات ساڑھے نو بجے کھیلا جائے گا جس میں پاکستان کا سامنا جرمنی سے ہوگا۔