ریٹائرڈ ہرٹ یا آؤٹ روہت سپراوور تنازع کا شکار

پہلے ٹائی بریکر میں بیٹنگ کے دوران میدان سے باہر گئے، دوسرے میں واپس لوٹ آئے

Sports Desk January 19, 2024

پہلے ٹائی بریکر میں بیٹنگ کے دوران میدان سے باہر گئے، دوسرے میں واپس لوٹ آئے۔ فوٹو: اے ایف پی/گیٹی امیجز

روہت شرما 'ریٹائرڈ آؤٹ ہوئے یا ریٹائرڈ ہرٹ' سپر اوور تنازع سامنے آگیا۔

افغانستان کے خلاف تیسرے ٹی 20 میچ میں 2 سپر اوورز کے بعد بھارتی ٹیم نے فتح حاصل کی تھی، میزبان کپتان روہت شرما پہلے سپر اوور میں بظاہر ریٹائرڈ آؤٹ ہوئے مگر پھر وہ دوسرے سپر اوور میں بھی بیٹنگ کیلیے آگئے تھے۔

آئی سی سی پلیئنگ کنڈیشن کے تحت اگر کوئی بیٹر پہلے سپر اوور میں آؤٹ ہوتا تو دوسرے میں وہ بیٹنگ کیلیے نہیں آسکتا، میچ آفیشلز کی جانب سے اس بارے میں وضاحت نہیں کی گئی کہ روہت ریٹائرڈ آؤٹ ہوئے تھے یا ہرٹ، دوسرے کیسے میں اگر وہ ریٹائرڈ ناٹ آؤٹ تھے تب وہ دوبارہ بیٹنگ کے اہل تھے۔

یہ بھی پڑھیں: بھارت نے افغانستان کو سنسنی خیز ''ڈبل سپر اوور'' مقابلے میں شکست دیدی

میزبان کپتان نے میچ میں 121 رنز بنائے تھے، پہلے سپر اوور میں انھوں نے تیسری اور چوتھی بال پر چھکے جڑے جبکہ پانچویں پر سنگل لیا، اب آخری گیند پر فتح کیلیے 2 رنز درکار تھے، یشاسوی جسوال نے گیند کا سامنا کرنا تھا، اتنے میں روہت ریٹائر ہوکر چلے گئے اور ان کی جگہ رنکو سنگھ نان اسٹرائیک اینڈ پر آئے تاکہ وہ تیزی سے وکٹ کے درمیان دوڑ سکیں، جسوال نے ایج پر سنگل لیا اور مقابلہ پھر برابر ہوگیا۔

اب چونکہ بھارت نے پہلے سپر اوور میں بعد میں بیٹنگ کی تھی، اس لیے دوسرے میں پہلے بیٹنگ کرنا تھا، روہت پھر اسٹرائیک پر آئے اور پہلی 2 بالز پر چھکا اور چوکا جڑا، اس اوور میں 11 رنز بنے جبکہ جواب میں روی بشونی نے اپنی پہلی 2 بالز پر افغانستان کی 2 وکٹیں اڑاکر ٹیم کو فتح دلادی۔

یہ بھی پڑھیں: افغانستان کو شکست دیکر بھارت نے پاکستان کو پیچھے کیسے چھوڑا؟

اب یہ بحث ہورہی ہے کہ روہت ریٹائرڈ ہرٹ ہوئے تھے یا ریٹائر آؤٹ، اس بات پر تنازع کھڑا ہوگیا ہے۔ بہرحال بھارتی ٹیم نے تیسرا میچ بھی جیت کر سیریز میں کلین سوئپ مکمل کرلیا ہے۔