شاہین کی کپتانی میں کیویز کے ہاتھوں مسلسل چوتھی شکست

ڈیرل مچل اور گلین فلپس نے 139 رنز کی پارٹنرشپ قائم کرکے گرین شرٹس سے جیت چھین لی (فوٹو: کرک انفو)

---

نیوزی لینڈ نے چوتھے ٹی20 میچ میں پاکستان کو 7 وکٹوں سے شکست دیدی۔

کرائسٹ چرچ میں کھیلے جارہے سیریز کے چوتھے میچ میں قومی ٹیم مقررہ 20 اوورز میں 5 وکٹوں کے نقصان پر 158 رنز بناسکی، پاکستانی ٹیم کے اوپنر صائم ایوب ایک مرتبہ پھر ناکام رہے، وہ محض ایک رن بناکر وکٹ گنوابیٹھے، بابراعظم 19 رنز بناکر ایڈم ملنے کا شکار بنے جبکہ فخر زمان 9، افتخار احمد 10 اور صاحبزادہ فرحان ایک رنز کے مہمان ثابت ہوئے۔

وکٹ کیپر بیٹر محمد رضوان 6 چوکوں اور 2 چھکوں کی مدد سے 90 رنز کی اننگز کھیلی محمد نواز نے میچ کے اختتامی لمحات میں 9 گیندوں پر 21 رنز بناکر ناٹ آؤٹ رہے۔

مزید پڑھیں: چوتھا ٹی20؛ اوپنر ڈیون کانوے کورونا وائرس میں مبتلا ہوگئے

نیوزی لینڈ کی جانب سے لوکی فرگوسن اور میٹ ہنری نے 2، 2 جبکہ ایڈم ملنے نے ایک وکٹ حاصل کی۔

ہدف کے تعاقب میں کیوی ٹیم کا آغاز بھی اچھا نہ رہا، اوپنر فن ایلن 8، ول ینگ 4 اور ٹم سیفرٹ صفر پر پویلین روانہ ہوئے تاہم ڈیرل مچل اور گلین فلپس نے چوتھی وکٹ کی شراکت میں 139 رنز کی پارٹنرشپ قائم کی اور میچ جتوادیا۔ دونوں نے بالترتیب 72 اور 70 رنز بناکر ناٹ آؤٹ رہے۔

پاکستان کی جانب سے شاہین آفریدی نے 3 کھلاڑیوں کو پویلین کی راہ دیکھائی انکے علاوہ کوئی بھی بولر وکٹ نہ لے سکا۔

قبل ازیں کیوی کپتان مچل سینٹنر نے ٹاس جیت کر پہلے فیلڈنگ کرنے کا فیصلہ کیا، انہوں نے کہا کہ میچ میں کامیابی سمیٹ کر کلین سوئپ پر نظریں مرکوز ہیں۔

اس موقع پر قومی ٹیم کے کپتان شاہین آفریدی نے کہا کہ کیویز کیخلاف کم بیک کرنا چاہتے ہیں، ٹیم میں ایک تبدیلی کی گئی ہے اعظم خان کی جگہ صاحبزادہ فرحان کو پلئینگ الیون کا حصہ بنایا گیا ہے۔

پاکستان اسکواڈ:

کپتان شاہین شاہ آفریدی، محمد رضوان، صائم ایوب، بابر اعظم، فخر زمان، صاحبزادہ فرحان، افتخار احمد، محمد وسیم جونئیر، محمد نواز، زمان خان اور حارث رؤف۔

نیوزی لینڈ کا اسکواڈ:

کپتان مچل سینٹنر، ول ینگ، ڈیرل مچل، گلین فلپس، مارک چیپ مین، ایڈم ملنے، میتھیو ہنری، ٹم ساؤتھی، لوکی فرگوسن، فن ایلن، ٹم سیفرٹ شامل ہیں۔