علم ِفلکیات کی روشنی میں آپ کا یہ ہفتہ

22تا28 جنوری 2024

---

برج حمل
سیارہ مریخ ، 21 مارچ تا20اپریل
آپ کے کیریئر، عزت و وقار اور ملازمت کے خانے میں ملازمت کے خانے کا نمائندہ عطارد، آمدن کا سیارہ زہرہ، اور آپ کا ذاتی سیارہ مریخ تینوں اسی خانے میں ہیں۔ ایسے میں مشتری جو کہ آپ کے بلند بختی کا سیارہ ہے، ان تینوں سیارگان کو سعد روشنی دے رہا ہے۔ اس بات کا قوی امکان موجود ہے کہ اس ہفتے کام، روزگار اور ملازمت کے امور میں بہتری کی توقع ہے۔ مالی فائدہ ہوسکتا ہے، شراکتی اور ازدواجی امور میں تناؤ بھی ممکن ہے۔

برج ثور
سیارہ زہرہ ، 21اپریل تا 20 مئی
آپ کا سیارہ نویں یعنی خوش بختی کے مقام پر ہے جہاں ایک اجنبی آپ کے لیے سہولت پیدا کرتا ہوا نظر آتا ہے۔ اس ہفتے آپ کا سفر ممکن ہے۔ بیرون ملک سفر اور اس سلسلے میں ضروری کاغذی کارروائی میں پیش رفت کا امکان موجود ہے۔ اس ہفتے کے آخری تین ایام آپ کو کوئی بڑی خوش خبری سناتے ہوئے نظر آتے ہیں۔

برج جوزا
سیارہ عطارد ، 21مئی تا 21 جون
آپ کا سیارہ خوف و الجھن کے مقام پر ہے، یہاں اس کی موجودگی ہم راہ زہرہ کچھ خفیہ امور اور مراسم کی سمت اشارہ کررہی ہے۔ اگر آپ کسی ایسے سلسلے میں کوشاں ہیں جو قانون سے متصادم ہے تو احتیاط کریں۔ اس ہفتے کیریئر اور آپ کے وقار پر حرف آسکتا ہے۔ ناگہانی مسائل درپیش ہوسکتے ہیں۔ اس ہفتے کے شروع میں مالی فائدے کا بھی امکان ہے۔

برج سرطان
سیارہ قمر ، 22جون تا 23 جولائی
آپ کا سیارہ قمر اس ہفتے مریخ، زہرہ، عطارد اور زحل سے اچھی نظر بنانے جارہا ہے، آپ کی منگنی یا شادی کا امکان ہے۔ تعلقات یا ساتویں خانے کا مالک سیارہ زحل نویں میں موجود ہے۔ اس بات کا امکان ہے کہ یہ رشتہ خوش بختی کا دروازہ کھولے گا۔ ایسے وقت میں دوسرا رشتہ بھی ممکن ہے۔ ماتحت کام کرنے والوں کا تعاون حاصل رہے گا۔

برج اسد
سیارہ شمس ، 24جولائی تا 23 اگست
آپ کا سیارہ شمس دلو میں ہے۔ یہاں اسے کم زور سمجھا جاتا ہے۔ یہاں آپ سے غلط فیصلوں کا اندیشہ پیدا ہوسکتا ہے۔ آپ پر مخالفین کا اثر ہوسکتا ہے۔ کچھ دوست جن پر آپ کو بڑا یقین ہے ان کی آستین سے سانپ برآمد ہوسکتے ہیں۔ مالی نقصان کا بھی اندیشہ ہے۔ اس ہفتے انتہائی محتاط رہیں۔

برج سنبلہ
سیارہ عطارد ، 24 اگست تا 23 ستمبر
آپ کا سیارہ زہرہ و مریخ کے ساتھ محبت کے خانے میں موجود ہے۔ ایسے میں اولاد اور محبوب سے خوشی کا امکان ہے لیکن چوںکہ زحل طالع کو ناظر ہے۔ محبوب و اولاد کے رویے سے کچھ شکوک وشبہات اور کسی وقت سردمہری کا بھی اندیشہ ہوسکتا ہے، ایسی صورت میں اپنے جذبات کو قابو میں رکھیں۔ یہ سلسلہ آپ کے لیے نتیجتاً اچھا ہی رہے گا، اگرچہ آپ کو کچھ صبر سے گزرنا ہوگا۔

برج میزان
سیارہ زہرہ ، 24 ستمبر تا 23اکتوبر
آپ کے خیالات کا سیارہ ایسے مقام پر ہے کہ جہاں آپ سے رو زمرہ کے عمومی امور میں غلطیوں کا امکان زیادہ ہے۔ یہاں یہ صورت حال مئی تک رہنے والی ہے اگر آپ کسی تحقیقی کام سے وابستہ ہیں تو آپ کے لیے یہ وقت معاون ہے، وگرنہ آپ کو اپنے اقدامات سے پیش تر کسی دوست سے مشورہ و نظرثانی کو بھلانا کسی مشکل سے دوچار کرسکتا ہے۔ گھر کی تزئین و آرائش پر توجہ ہوسکتی ہے۔

برج عقرب
سیارہ پلوٹو ، 24 اکتوبر تا 22 نومبر
پلوٹو عظیم سیارہ جو کہ آپ کے طالع کا مالک ہے۔ آ پکے چوتھے خانے میں آچکا ہے یہاں آپ کو اپنی اور اپنے خاندان کی بنیاد کو مضبوط کرنے کی ضرورت محسوس ہوگی۔ اگلے چند سال آپ کی توجہ مکان، ازدواجی تعلق اور کیریئر پر مرتکز رہنے والی ہے۔ آپ کی سنجیدگی کئی گنا بڑھ جائے گی۔ آپ کے رویے کی سرد مہری سے کچھ افراد کو آپ سے گلہ بھی ہوسکتا ہے اور دوری بھی۔ اس ہفتے محبت کی توانائی آپ کو حاصل رہے گی۔

برج قوس
سیارہ مشتری ، 23 نومبرتا 22 دسمبر
آپ کے بارھویں یعنی اجنبی افراد و مقامات کا سیارہ آپ کی سوچ پر سوار ہوچکا ہے یہاں آپ کے بیرون ملک سفر کے بھی امکانات ہیں اور امیگریشن جیسے امور میں کام یابی مل سکتی ہے۔ آپ کی سرمایہ کاری کا تعلق بھی کسی نہ کسی طور بیرون ملک یا کسی عالمی ادارے کے ساتھ ہوسکتا ہے۔ بہرحال آپ کا کام وسعت اختیار کرتا ہوا نظر آرہا ہے۔ اس ہفتے کے آخری دن اچانک کوئی فائدہ ہوسکتا ہے۔

برج جدی
سیارہ زحل ، 23 دسمبر تا 20 جنوری
آپ کے ماتھے پر مریخ کا سرخ نشان پڑسکتا ہے۔ سفر کے دوران ہیلمٹ ضرور استعمال کریں، کیریئر اور گھر پر توجہ رہے گی۔ ایسے میں اولاد سے راحت مل سکتی ہے۔ پلوٹو آپ کے دوستوں کے خانے کا مالک ہے۔ گویا آنے والے ایام میں دوستوں کا تعاون حاصل رہے گا۔ تحفے تحائف مل سکتے ہیں۔ مریخ وزہرہ کا قرب آپ کو مالی اور ازدواجی سکھ دیتا ہوا نظر آتا ہے۔

برج دلو
سیارہ یورنیس ، 21 جنوری تا 19 فروری
پلوٹو طالع میں آچکا ہے۔ یہاں یہ آپ کی توجہ معاشرتی وقار اور کیریئر پر مبذول رکھے گا۔ پلوٹو کا کردار کسی نہ کسی حوالے سے خفیہ لازماً رہتا ہے۔ اس ہفتے آپ کا بیرون ملک، اجنبی افراد اور اجنبی مقامات کا خانہ متحرک ہورہا ہے۔ ایسے افراد سے فائدہ ہوسکتا ہے۔ آپ کو مکان اور اپنی منصوبہ بندیوں میں اچانک تبدیلیوں کی ضرورت پڑ سکتی ہے۔ مکان یا زمین سے فائدہ ہوسکتا ہے۔

برج حوت
سیارہ نیپچون، 20 فروری تا 20 مارچ
آپ کے سفر مذہبی بڑھ سکتے ہیں۔ یہاں اس ہفتے آپ کے دوستوں کے آپ کے ساتھ تعلقات میں گرم جوشی نظر آرہی ہے۔ آپ کا سیارہ نیپچون آپ کو مراقبے اور مافوق الفطرت امور میں دل چسپی دلاتا ہوا نظر آتا ہے۔ کچھ ایسے افراد کہ جن سے ایک عرصہ ہوا رابطہ نہیں ہوا تھا رابطے میں آسکتے ہیں۔ یہ ہفتہ مالی اور ازدواجی حوالے سے ایک بہتر ہفتہ ہے۔