کراچی شادی سے گھر واپس جاتے خاندان کو ٹریلر نے کچل دیا ماں اور بیٹی جاں بحق
حادثے میں شوہر محفوظ رہا، مشتعل افراد نے ٹرک کو نذر آتش کردیا
شہر قائد کے علاقے کورنگی ڈیڑھ نمبر پیٹرول پمپ کے قریب شادی سے گھر واپس جانے والی موٹرسائیکل کو تیز رفتار ٹریلر نے کچل دیا، جس کے نتیجے میں ماں اور بیٹی موقع پر جاں بحق ہوگئیں۔
تفصیلات کے مطابق کورنگی نمبر ڈیڑھ میں ٹریلر کی زد میں آنے والی موٹر سائیکل پر سوار دو خواتین موقع پر جاں بحق ہوئیں جن کی لاشوں کو ضابطے کی کارروائی کیلیے جناح اسپتال منتقل کیا گیا جبکہ موٹرسائیکل چلانے والا شخص معجزانہ طور پر حادثے میں محفوظ رہا۔
ڈاکٹرز کے مطابق حادثے کے نتیجے میں دونوں خواتین کا چہرہ اور سر بری طرح سے متاثر ہوا تھا، جس کے نتیجے میں اُن کی موت ہوگئی۔ اسپتال میں لاشوں کی شناخت 42 سالہ نادیہ زوجہ نیاز جبکہ 15 سالہ شمائلہ کے ناموں سے ہوئی۔
ریسکیو حکام کا کہنا ہے کہ ابتدائی طور پر بتایا جا رہا ہے کہ موٹر سائیکل سوار میاں ، بیوی اور بیٹی شادی کی تقریب میں شرکت کے بعد گھر جا رہے تھے کہ افسوسناک واقعہ پیش آگیا۔
واقعے کے بعد موقع پر موجود مشتعل شہریوں نے ٹریلر پر پتھراؤ کر کے اُسے کے شیشے توڑے اور پھر ٹرک کو پیٹرول چھڑک کر آگ لگا دی، جس کے بعد پولیس موقع پر پہنچ گئی اور مشتعل افراد کو منتشر کیا۔