اپر کوہستان میں مزدوروں کو لے جانے والی گاڑی کو حادثہ تین افراد جاں بحق

حادثے کے زخمیوں کی اسپتال میں طبی امداد کا منظر (فوٹو : ایکسپریس)

---

اپر کوہستان میں مزدوروں کو لے جانے والی گاڑی حادثے کا شکار ہوگئی جس کے سبب تین افراد جاں بحق اور سات زخمی ہوگئے۔

ایکسپریس نیوز کے مطابق اچھاڑ نالہ اپر کوہستان میں رات گئے مزدور لے جانے والی گاڑی حادثے کا شکار ہوگئی جس میں 10 افراد شدید زخمی ہوگئے۔

امدادی ادارے 1122 کے مطابق کنٹرول روم کو اطلاع ملتے ہی میڈیکل ٹیم مع ایمبولینسز موقع پر پہنچی اور امدادی کارروائیاں شروع کیں، ریسکیو1122 نے تمام زخمیوں کو ابتدائی طبی امداد فراہم کرکے ڈسٹرکٹ ہیڈ کوارٹر داسو منتقل کردیا جہاں ڈاکٹروں نے تین افراد کے جاں بحق ہونے کی تصدیق کردی۔

امدادی ادارے کے مطابق شدید زخمیوں کو لوئر اور اَپر کوہستان کی ایمبولینسز میں ایبٹ آباد منتقل کردیا گیا۔