خیبر پختون خوا کے عوام کو بے وقوف کہنے پر اے این پی کا نوازشریف سے معافی کامطالبہ

یہ لوگ کس منہ سے خیبر پختون خوا آکر ووٹ مانگیں گے، ترجمان اے این پی ثمربلور

---

خیبر پختون خوا کے عوام کو بے وقوف کہنے پر اے این پی نے سابق وزیراعظم نوازشریف سے معافی کامطالبہ کردیا۔

اے این پی کی ترجمان ثمربلور نے کہا کہ مسلم لیگ ن کے قائد اور تین بار وزیراعظم پاکستان کے عہدے پر رہنے والے شخص کو یہ زیب نہیں دیتا کہ ایک صوبے کے عوام کو بیوقوف کہے، یہ الفاظ ایسے وقت کہے گئے جب انکی بیٹی اسی صوبے میں انتخابی مہم چلارہی تھیں، یہ لوگ کس منہ سے یہاں آکر ووٹ مانگیں گے۔

ثمربلور نے کہا کہ ماضی میں اسی جماعت نے ہمارے حقوق دینے سے انکار کیا تھا اور رہبرتحریک خان عبدالولی خان نے اتحاد سے نکلنے کا اعلان کیا، شاید آج نوازشریف صاحب ایک بار پھر تاریخ دہرارہے ہیں۔

ان کا کہنا تھا کہ ہمیں معلوم ہے کہ پنجاب کا ڈومیسائل رکھنے والا ہر شخص اس ملک میں معزز سمجھا جاتا ہے لیکن پختونخوا کے عوام کے نمائندے ابھی موجود ہیں۔

انہوں نے مزید کہا کہ ہم اس عمل کی نہ صرف مذمت کرتے ہیں بلکہ مطالبہ کرتے ہیں کہ نوازشریف صاحب اپنے الفاظ واپس لے کر پوری قوم سے معافی مانگیں۔

بے کار کا لوگوں کو بے وقوف بنایا ہوا ہے اور چند لوگ ہمارے بے وقوف بھی بن جاتے ہیں آسانی کیساتھ سب کی بات نہیں کرتا سب سے آسانی کیساتھ بے وقوف خیبر پختونخوا کے بن جاتے ہیں یہ بیماری ادھر سے آئی ہے انہیں سمجھنا چاہئے کہ انہوں کس طرح کے بندے کو موقع دیا۔ نوازشریف pic.twitter.com/9HYIdLSq1j

- Muhammad Faheem (@MeFaheem) January 27, 2024