ویسٹ انڈیز کی تاریخی فتح گلکرسٹ اور لارا کے گلے ملنے کی ویڈیو وائرل
ویسٹ انڈیز نے 27سال بعد ٹیسٹ میں آسٹریلیا کو اسی کی سرزمین پر شکست دی
آسٹریلیا کی سرزمین پر 27 سال بعد ویسٹ انڈیز کی ٹیسٹ میں تاریخی فتح پر کمنٹری روم میں بیٹھے سابق آسٹریلوی اوپنر ایڈم گلکرسٹ اور معروف سابق ویسٹ انڈین بیٹر برائن لارا کے گلے ملنے کی ویڈیو سوشل میڈیا پر وائرل ہوگئی۔
برسبین ٹیسٹ کے چوتھے روز ویسٹ انڈیز نے آسٹریلیا کو 8 رنز سے شکست دے کر تاریخی کامیابی سمیٹی اور کینگروز کے خلاف ٹیسٹ میں شکست کا تسلسل بھی ختم کر دیا۔
سوشل میڈیا پر وائرل ویڈیو میں دیکھا جا سکتا ہے کہ شمر جوزف جیسے ہی آسٹریلیا کی آخری وکٹ لیتے ہیں تو کمنٹری بوکس میں بیٹھے ایڈم گلکرسٹ اپنی نشست سے اٹھ کر برائن لارا کو گلے لگاتے ہیں، دونوں سابق کھلاڑی ویسٹ انڈیز کی تاریخی فتح پر پرجوش نظر آتے ہیں۔
فتح کے موقع پر کمنٹری بوکس میں بیٹھے برائن لارا کہتے ہیں کہ ویسٹ انڈیز نے آج آسٹریلیا کو اسی کی سرزمین پر شکست دے کر تاریخ رقم کر دی ہے اور یہ دن ویسٹ انڈیز کی کرکٹ کے لیے سب سے بڑا دن ہے۔ ٹٰم کو بہت بہت مبارک ہو!
آسٹریلوی کمنٹیٹر ایڈم گلکرسٹ نے بھی برائن لارا کی بات کو سچ قرار دیتے ہوئے ویسٹ انڈیز ٹیم کو مبارک دی۔